Urteak dira Andramariak eta Emeteriak herritarron parte hartze aktiboan oinarrituta burutzen ditugula. Aurtengo egitarauan ere, herritarron parte hartzeagaz baino burutu ezin diren hainbat ekintza antolatu ditugu:

– Futbol 7 txapelketa: Izena igerilekuetan eman.

– Kantuz kantu eta Larrabetzubision: Jana eta edana nork berea. Musika, herriko hainbat musikarik eta Larrabetzubision…

– Triatloia: Igerian, bizikletan eta galapan. Hiru laguneko taldeak eta ahal dela, neska eta mutilek osatutakoak

– Txupinazoa: Kukubiltxon hasi eta plazaraino, larrabetzuar guztiok Akarmari, Paskuala, Matxin eta txistularien atzetik.

– Pintxo dastaketa: Jateko gero eta lagun gehiago eta PINTXO GUTXIAGO!! Jatekoa den edozerk balio du, ez nagitu eta ea plaza pintxoz betetzea lortzen dugun!

– Asto karrera: Andramari egunean, gonbidatuak izaten ditugu etxean, bazkaloste luzea. Asto karreran parte hartzen dutenek, bazkaria ahoan joan behar izaten dute astoak garbitu eta txukuntzera. Aurten, izena aurretik eman beharko da eta nork bere astoa garbitu beharko du, horrela lana banatu egingo dugu eta guztiok asti gehiago izango dugu bazkalosteaz gozatzeko.

– Karrozak: Egitarauan agertzen ez bada ere, gurean aspaldiko ohitura dena berreskuratzeko deia luzatu gura dizuegu.

– I. Mendi bizikleta martxa: Adin guztietako larrabetzuarrontzat prestatu dugu, Larrabetzu hobeto ezagutu eta bizikletan ibiltzea gogoko duenarentzat.

– Sukalki txapelketa: Jana, edana eta ostantzeko guztia, nork berea.

– Goitibeherak: Iazko etenaren ostean, aurten berriro antolatu ditugu Larrabetzu Racing elkarteari esker.

– Koadrilen arteko jokoak: Bigarren urtez, gure arteko harremanak estutu eta lehiatu barik, olgetako proposamenak.