Hori Gaztetxean pasa den barikuan hasi zan Uribe Butroeko bertsolari Txapelketaren lehen kanporaketa. 70 lagunetik gora betetu zeurien gaztetxea. Afalostean sei bertsolariak taula gainera igon eta hasi ziren kantuan. Grabadora martxan jarri eta hauxe da han jaso zana:
Bertsoaldi onenak
8ko handian
bildu.net-en gorde
Trine 2 (PC, Mac, PSN eta Xbox live)
Plataformak eta akzioa nahasten dituen abentura, Erdi Aroan kokatua. Azti bat, gerlari bat eta lapur bat protagonista. Denen abileziak uztartuz, aurkezten zaizkigun puzzle, enigma eta arriskuetatik onik atera beharko dugu. Irudi koloretsu eta ederrak eskaintzen dizkigu, eta garaiko musika lasaigarria ere bai. Beste bi lagunekin batera online edo lokalki aritzeko aukera dakar labur samar geratzen den eta erabat gomendagarria den Trine 2 honek.
I am Alive (Xbox live eta PSN)
Urtebete pasatu da, hondamendi global bat tarteko, ia-ia giza zibilizazioa desagertu zenetik. Gizon batek bizirik irauteko motiboa dauka: emaztea eta alaba aurkitzea. Hirietako kale ilunetan barrena ibiliko da haien bila, eraikin altuak eskalatzen aire garbi bila. Bidean, besteengan konfiantza galdu duten talde armatuak aurkituko ditu, era berean biktimei laguntza eskaintzeko prest daudenak. Mundu honetan bizirauteko prest al zaude?
Pinball Arcade (Android)
Pinball jokoak gustuko badituzu, hau probatu behar duzu. Farfight Studios-ek garatu du, mota honetako jokorik onenak argitaratu dituen berberak. Garai guztietako mailak aurkituko ditugu, xehetasunez irudikatuak, musika eta efektu originalekin. Guztira lau aukera: Williams Tales of the Arabian Nights, Ripley’s Believe It or Not, Gottlieb Black Hole eta Bally Theatre of Magic. Hurrengo eguneraketekin maila gehiago eskainiko dizkigute. Doan da.
Gaztezulo aldizkarirako egin dudan kolaborazioa.
bildu.net-en gorde
Zynga Poker (Facebook eta mugikorretarako)
Azkenaldian Facebookerako eta mugikorretarako egindako bideojokoek arrakasta handia dute. Zynga Poker Facebookeko gunean, adibidez, milaka jokalari elkartzen dira Texas Hold’em estiloko pokerrean aritzeko. Jokatzen ikasteko modu erakargarria da, gure lagunekin lehian ibili baikaitezke, eta dirurik xahutu gabe gainera. Pokerra modan dago; erabakiak hartzea eskatzen du eta mugimendu estrategikoak erabiltzen ditu. Probatu nahi baduzu, hemen: http://zyn.ga/XY
Mus (Facebook eta mugikorretarako)
Pokerraren sukarra ezagutu baino lehen, euskaldunak beti aritu izan gara geurea den karta jokoan, musean. Interneten online jokatzeko aukera daukagu orain, Ideateca izeneko Bilboko enpresa baten eskutik. Oraindik Beta bertsioan edo froga fasean dagoen arren, arazo barik lehiatu gaitezke lagunekin batera apps.facebook.com/jugaralmus/ atarian. Android sistema darabilten dispositiboekin ere bateragarria da.
The Passenger (Android)
Misterioz beteriko mundua. Puzzleak, asmakizunak eta beste mini-joko batzuk aurkituko dituzu abentura grafiko estiloa duen titulu honetan. Bizi ezazu esperientzia erlaxagarri bat, ezin hobeto girotuko zaituen musika entzunez eta eskuz eginiko irudi ederrekin gozatuz. Abentura hau Android darabilten ukimenezko pantaila duten dispositiboetarako diseinatu dute, eta aproposa da buruari eragiteko.
Gaztezulo aldizkarirako egindako kolaborazioa.
bildu.net-en gorde
Skyrim (PC, PS3, Xbox 360)
Thel Elder Scrolls rol jokoen bosgarren atala da hau. 2006 eta 2008 urteetako onenak izendatu zituzten, eta orain beste mundu birtual erraldoi bat dakarkigute nahi dugun erara, askatasun osoz, esploratzeko. Fantasiazko rol jokoak nahi duguna izateko aukera eskaintzen digu: magoa, gerlaria, banpiroa… ehundaka ordu sartuta ere ez dugu munduaren erdia ezagutuko.
Slice It (Mugikorrentzat)
IOS eta Android daukaten gailuetarako diseinaturiko joko sinple eta entretenigarria. Pantailan irudi geometrikoak azaltzen zaizkigu eta gure atzamarrarekin, cutter batekin bezala, zatitu beharko ditugu. Baina ez edozelan, eskatzen diguten tamaina bereko zatiak eginez baizik, zatiketa kopuru zehatz bat eginez. Mailak gainditu ahala, gero eta irudi konplexuagoak azalduko zaizkigu. Zentimo gutxi batzuren truke mugikorrean deskargatzeak merezi du.
Mario Kart 7 (Nintendo 3DS)
Lasterketak dimentsio berri batera daramatza Mario Kart bildumaren zazpigarren honek, eta inoiz baino zoroagoak eta dibertigarriak izango dira. Lur, aire nahiz itsasoz, Txanpinoiaren Erresuman zehar ibiliko gara. 3D sentsazioa txapela kentzeko modukoa da eta, hau gutxi balitz, zirkuitu berriak, ahalmen berezi berriak eta neurrira egindako kartak ere badakartza. Aurrekoetan bezala, emozioa bermatuta dago.
Gaztezulo aldizkarirako idatzi dudan artikulua
bildu.net-en gorde
