-
21.454 bisitari 2007an
Harrituta nago. Ez diot normalean, jaramon askorik egiten kontagailuari. Baina wordpress plugin bat badaukat jarrita. Lantzean behin begiratzen diot, gai batek edo besteak ze harrera duen begiratzeko ez bada be.
Egunotan begira egon natzaio. Eta kalkulagailuan datuok batzean: 21.554. Arraioa! Asko dira ba… eta egunotan gainera, milatik gora bisitari astero.. 1100, 1200… harritzekoa. Asteburuetan ez da kopuru nabarmentzekorik egoten
Eta apurka apurka, gero eta bisitari -beraz, irakurle pentsatu nahi nuke- gehiago direla ikusita… iazkoak hilez hile zenbatzeari ekin diot. Hori izan da arrazoia. Eta horrek gogoetara eroan nau.
Eguneroko bisitari kopurua
Eta egunero egunero 200dik gora zaretela jakiteak, zer pentsatua ematen dit. Azekn egunotan, 300 baino gehiago ere pasatu zarete gainera. Euskaraz baino idazten ez den gune pertsolanala izateko, asko iruditzen zaizkidalako. Kopuru garrantzitsua da dudarik gabe. Eta apurka apurka, hazten doa gainera.
Euskarazko liburuak, euskarazko prentsa, euskarazko telebistak ze oihartzun duen badakit gutxi gora behera…. eta proportzio hoietara egokituta… 300 lagunek blog hau bisitatzea… luxua iruditzen zait. Neurrian erantzuten saiatzen naiz, saiatu beharko, aurrerantzean ere.
euskarazko sarea
Igoera horretan, bereziki estimatu behar ditut hiru gune: Aurki.com, Zabaldu.com eta Gaur8.info. Hiruretatik trafiko gero eta gehiago bideratzen da aspaldion. Hirurak dira garrantzitsuak… eta alde horretatik, gure sarearen onurak ikusten ditut horrela. Euskarazko sareak, elkar laguntzeko balio du. Euskarazko sarean, batek besteari eskaintzen dizkio irakurleak. Loturen bidez, aipamenen bitartez, erantzunetan, hari eta kateetan. Estimatzekoa da hori, baina lanaren ordaina ere badela pentsatu gura dut.Euskarazko blogosfera gora doa
Hori pentsatzen du nik behintzat. Egunero egunero idazten dugunak, ez gara asko. Baina egunero erreferentzia bila dabiltzanak ordea, gero eta gehiago dira. Jendeak, beste informazio mota bat bilatzen du. Zuzenagoa, subjetiboa, erreferentziak emango dizkiona, ikuspuntua nabarmenduz, ertzak estimatzen ditu gure irakurleak.
Irakurleen iritzia jasotzea ere ez da erraza. Aukera ematen diogun arren, beti ez da lortzen, baina hori bai, lortutakoan eskertzen da hori ere.
Euskarazko blogosferak, gero eta jarraitzaile gehiago ditu, eta hori da erakargarriena. Apurka apurka, ikusmolde ezberdinetako guneak ditugu gurean. Informazio orokorra, kulturaren inguruko ekimenak, gai teknologikoak lantzen dituzten blogak, partehartzeko aukerak, ideologiaz mintzatzeko gunetxoak… denetarik daukagu. Apurka apurka, sare handiago da gurea.Tresnak ere, gero eta gehiago ditugu. Gero eta eskurago. Eta tresna bakoitzaren inguruan ere, komunitateak sortzen dira. Komunitateek irakurleak sortzen dituzte… eta komunikazioa lantzen da horrela. Joan, etorri, geratu, erantzun, sortu… badakizue.
Esan beharrik ez dago, baina mila esker, berbok irakurtzeko ahalegina egiten duzuon guztioi.
-
Atzera begira (2007an idatzitakoak)
Urte berria eta promesa zaharrak. Astea daramagu egutegi berriari egunak kentzen, eta negua hotzago da ordutik ordura.
Bloga izoztuta geratu zaigu, eta ezer idatzi aurretik, iazkoak gogoratzen pasa dut arratsaldea.
Hilez hile ibili naiz. Eta egia esan, idatzi behintzat irakurri baino gehiago egin dudalakoan nago. Ahaztuta nituen batzuk, baina irakurtzen hasita… a ze urtea 2007koa!
Gogoratzen jarrita.
Abendua. irratia.com emankizunaren 100. saioa egin genuen Bilboko Kafe Antzokitik.
Azaroa. Astero Info7 irratirako egiten dudan tartean, AHTgelditu.org gunearen inguruan egindako gogoeta. Ahtgelditu.org herri mugimenduak eta sarea.
Urria. Hitzak soberan, guk free batasuna esan genuen. Egoera gogortzen hasia zegoen. Ez du atertu oraindik.
Irailak 27. Ondo gogoan daukadan istripu hura. A8… eta bizirik nago eta zenbat erantzun. Lagunekin berriro hasteko aukera izan nuen. Bizitza barri bat, zeozelan esatearren.Â
Abuztua. Normalean opor hilabetea gehienontzat. Jaietarako be aproposa. Larrabetzu jaietan zenez, enuen besterik idatzi.
Uztaila. Uda izan arren, teknologia berriei ekin genien zenbait egunez Tailerrak 2.0 ekimen ikaragarri interesantean.
Ekaina. Bilbo BBK live kontzertutik bueltan idatzitako Txin txin txin txin! diruaren rocka.
Maiatza. Zer gertatu da Larrabetzun? Eta hauteskundeetako emaitzak azaltzen saiatu nintzen. Egoera berria herrian. PNV-k eta ANV-k zinegotzi kopuru berdina (4-4) eta Aralar-EBk beste bat.
Apirila. Korrika bukatu zen Iruñean. Biba zuek idazteko indarra eman zidan amaierak.
Martxoa. Bereziki gogoratzen dut Korrika 15 hori. Baina batez be race to save basque language izenburuak zerbait markatu zuen. Medio interesgarria ezagutu genuen Kanadatik.
Otsaila. Ezagunak ez diren bost gauza*Â Nik ere meme horretan parte hartu nuen.
Urtarrila. Ez daukat gogorik (ezer idazteko) eta egia esan urteari ekitea kosta egiten da holakoetan.
Urteak joan urteak etorri, gero eta gehiago gara euskaraz idazten dugun blogariak. Ea zelan ekiten diogun hasi berri dugun idazturte honi.
-
Egunerokotasuna hautsi gurean, bitakora
Hamaika urte baino gehiago dira kazetaritzaren munduan murgilduta nabilela. Irratian eta prentsan aritu naiz, baina Internet aspalditik darabilt. Orain, Informazioaren gizartean; egunero egin izan dudana, egunero egiten jarraituko dut, baina kasu honetan bitakora honetatik.
Idatzi, gogoetak ekarri. Inguruan ikusten dudanaz informatu. Herriko giroa, Euskal Herriko gertaeren inguruko hausnarketa apalak, teknologia berrien inguruan ikusten eta ikasten dudana. Kontatu gura dudan guzti horretarako baliatuko dut gune hau.
Ikasten ari naiz, eta gura izan ezkero nigaz murgildu zaitezkete honetan. Bidailagun eta bide lagun.Bitakora osatzeko urratsak
Bitakora edo blog hau egiteko WordPress erabiltzen ari naiz, edukien kudeaketarako, eta batipat blogak egiteko dagoen software librean den programarik onenetakoa, aproposena bai behintzat. Une honetan euskaratze prozesuan dago programa bera, eta laister, gune honetako interfaze guztiak ere euskaraz irakurri ahalko dituzue.
WordPress oso erraza iruditu zait. Erabilterreza. Aukera asko ematen ditu. Estiloei dagokionez adibidez, aukera asko eskaintzen ditu; css-etaz ezer ez dakienetakoa nauzue, baina Alexking adituaren gunean, estilo ugari ikusi ditut, eta gune honetarako WordPress css lehiaketan bigarren postua erdietsi zuen Rubrick estiloa hautatu dut. Denborarekin aldatuz joango naiz beharbada… ikasiaren podasuz.
Hosting-a berriz blogthing gunean hartu dut, doakoa da, eta ikasteko oso oso aproposa. Unibertsitatean, Gorka Palazioren bitartez ezagutu nuen tokia, eta laister berak ikasle eta lagunentzat antolatutako berriemaile.com gunera abiatuko emigratuko dut. Laister izango da hori, bitartean hemen jarraituko dut ikasten eta nire froga guztiak egiten. Gero gune osoa eramango dut zerbitzari euskaldun horretara.
Gune hau ikusteko, Firefox nabigatzailea aholkatzen dizuet. Oso ona da. Arina eta eraginkorra, eta laister oso emaitza onak erdietsiko ditu mundu osoan. Abiadura handiz ari da hedatzen, eta euskaldunok ere horren aldeko apustua egin beharko genuke. Euskaratze bidean da gure lukia ere, eta aurki izango dugu guztion eskura.
