Astea zelan badoan

Asteon idatzitako apunteak garbira pasatzen

Blog guztiak irakurrita daudenerako ari naiz berbok idazten. Bazkal aurretik, eta etxeko une lasai bat profitatuz. Ez dira asko izaten gurean, eta horregatik azkar azkar idatzi beharko ditugu bota beharrekoak.

Asteak joan asteak etorri, blogak badirau. Laster dira zenbait urte blogari ekin niola, eta perspektiba horrekin idazten ditut orain honek kontuok. Batzutan bape lotsa barik, beste batzutan ardura gehiagogaz… baina beti badago zer kontatua. Zertaz jardun. Zeri egurra emon. Eta zergaitik iritzia emon. Hori du blogintzak. Eremu librea da, eta askatasuna maite dugunok… ezin lehertu barik iraun.

Musikari erreparatzen
Egia esan, eta atzera begira, egun hauek musikero itxura hartu dute. Bideoak, kantuak, aipamenak, elkarrizketa musikala… ezin afizioari hutsik egin. Durangoko azoka etorri dator, eta aprobetxatu egin behar da musikaren olatua ere. Irrati komertzialetan bezala, gurean ere gora egin du musikak egunotan. Baina ez da dana musika gurean, badira beste kontu batzuk be.

irratia.com gogotsu
Bistan denez, esku artean ditugun proiektuen artean, ezagunena eta potenteena irratia.com da, duda barik. Ikasturtea gogoz abiatu dugu, eta elkarrizketa onak egin ditugulakoan gaude. Aurreko astean Fermin Muguruza gonbidatu genuen gurera eta asteon gu joan gara gonbidatu Tagzaniara. Ferminek bere grabatzeko estudio mugikorraren berri eman bazigun, gu gitxiago ez, eta gure estudioa mundura atara dugu.
Maletak hartu eta hor goaz, mundua ezagutzera. Zuzeneko emanaldi bat eskaintzera, Internet bidez. FM bidez. Tagzaniako hiriburua Eibar da. Eta bertaratu ginenean zain genituen tagzaniarrak. Luistxo Fernandez, Gari Araolaza eta Mikel Lizarralde. Guk gure trasteak motxiletatik atara eta mahai gainean jarri genuen gure tresneria guztia -gutxi egia esan, mahai txiki bat, cd erreproduktore bat, bi mikro eta ordenadoreak- eta wifi bidez  skype erabilita konexioa egin genuen Bilbo Hiria irratiko estudioarekin. Bat, bi eta hiru. Sintonia jarri eta zuzenean….

Argazkiak.org | Irratia.com Tagzanian © cc-by-sa: garaolaza
Tagzania berria sarean jarri zuten bezpera gauean, eta eibartarren lehenengo elkarrizketa zen. Mamia bazegoen. Gaiak ordea askorako ematen du, Tagzaniatik hasi -mundutik- eta gure ingurura hurbildu ginen apurka apurka, mapak, gps-ak, blogak… denetarik. Berbatarako hiru aditu. Hiru lagun atsegin moldatu zirenak. Entzuleena da hitza orain.
Entzun gura izan ezkero, hemen duzue saioa:

Albistea Indian dago ordea
Eibartik lanera, lanean lanekoak eta etxera buelta. Egun normala. Euskal Herrian bederen. Goizero eskolako atean agurtzen dudanarentzat ordea, bestela dira gauzak. Jarri zuen burua une batez Indiako hotel bateko jatetxean. Jaione eta Karmelo afaltzen ari dira. Euskal Herritik Indiara joanak, lehen eguna bertan. Afaltzen ari direla tiroka hasi dira batzuk, lehenengo hildakoak, odola, eskuko granadak, leherketa gehiago. Kontatzen dutenez, handik, hoteletik ihes egin eta azpikoaldera joatea lortzen dute. Hotel baten azpiak, bestearekin lotzen du. Eta handik parking batera. Beraien lagunak hotelean geratu dira, harrapatuta. Ezin ihes egin. Parkingean bueltaka eman dute gaua, eta gero ezagun batzuen etxera edo. Goizez berba egin dute Euskal Herriko irratiekin. Osteguna da Euskal Herrian.

Zerbait aditu dut goizean dendan, ez dut elkarrizketa osoa harrapatu ordea. Ez dakit zertaz ari diren. Mumbai albiste da nonbait. Sarean dena dator kontatuta. Irudiak, bideoak, kontaketak. Indiako demasa izan da. Bi larrabetzuar bertan. Bi lagun. Bi auzokide. Larrabetzuko blogetan be aipatzen da kontua.

Horrelakoetan barruak buelta ematen dizu. Pelikula. Atzo goizean agurtu duzuna, munduaren beste aldetik ari zaizu hizketan irratian. Herriko hizkeran. Bere berbek oihartzun egiten dizute etengabe, Interneteko play horri sakatu…eta ezin sinestu gertatutakoa. Ezin lotu. Argazkiak, kronikak, irudiak… sinestezina.

Larragetxo sound
Musika jarri lasaitzeko, musika entzun burua beste zerbaitetan jarduteko. Egunkariak irakurri. Sarean ibili. Twitter mezu laburrak kateatu. Baina ezin. Hegazkina noiz iritsiko. Noiz dena baretuko. Herrian beste berbagai bat hartu beharko. Kasurako, gaur kontzertua dago gaztetxean. Erromoko talde gazte batek, 15 urte betetzen ditu. Gazte? Oraindik bai. Izenik ez. Gurean ospatuko dute. Larrabetzuko Hori Bai gaztetxean. Ondoan izango dituzte Alproja taldekoak. Aspaldi desagertuak. Errautsetatik baina, garai bateko kantuak aurkeztuko dituzte, barriro be. The Clash taldearen bertsio orijinalenetako bat, 90. hamarkada hasierako rock algortarra. Larragetxon gaude baina. XXI mendean.

Astea zelan badoan, gogoetarako tarte gitxi. Iritziak biharamuneko kafearekin urtzen dira. Solasaldiak astun. Berbak ez ditu baina haizeak eroango. Keinu bat nahikoa izango da guztia ulertzeko. klik. play. off.