Hasi da Korrika 15
Hasia naiz Donibane Garazitik. Hasia dut Gasteiztik. Hasi nintzen Mauletik. Hasita daukat Orreagatik… denak dira ezberdin. Denak dira hunkigarri.
Gaur Internetetik hastea egokitu zait. Info7 irratia entzuten nuen ordenadore ondoko bafleetatik, Euskadi Irratia entzuten zen irratitik… eta oinak arineketan ez zaizkit hasi ba!
Karrantzan burua, Bartzelonatik idazten ari zitzaidan Arkaitz, eta Twitter bidez nire sentimenduak adierazi gura nituen sortu berri dugun euskaldun komunitate birtual horretan.
Hasi da Korrika, eta nahastuta ibili naiz. Korrika egin nahi nuen, baina ezin lau pareta hauetatik irten. Hotza kalean. Edurra ikusten da oraindik. Hotza behar du Karrantza aldetik ere, baina bero egongo da giroa.
Bihar eta etzi. Domekan. Astelehenan. 10 egun eta 2510 kilometro inguru aurretik. Internetetik, prentsatik, irratitik, aurrez aurre jarraituko dugu Korrika. Ahal den bezala, baina Korrika ez da geldirik egoteko, ez horixe.
2 Iruzkin
Pingback-a:
Begoña de Fuste
BURUTAZIOAK
Goizean, kalean jendea erdaraz entzuten dut. Eguerdian ere, koadrilan gero eta gehiago… ni gutxienez zorteduna naiz eta etxean euskaraz egiten dut, baina ezin dutenek? Ez dakit jendea nola bultza daitekeen euskaraz egitera, ez dira konturatzen euskararen jabe izatea nolako aberastasuna den, Europa eta munduko hizkuntza zaharrenetakoaren jabe izatea ez baita gutxi.
Baina jakitea eta ikastea ez dira nahikoa, erabili egin behar da.
Nire ametsa: kalera, erosketak egitera, zinemara, igerilekura…. irten eta euskaraz entzutea. Egoera ez da onena, diglosi egoeran gaude eta ez edonolako hizkuntzekin, Espainola eta Frantsesa bezalako bi hizkuntza sendorekin, zaila da aurrera irtetea, eta guztiok egin behar dugu zerbait horretarako, baina ez nago prest gure arbasoen borroka hemen amaitzeko, aurrera egin behar dugu gure hizkuntzarekin, ezin da etsi.
Idatzi xume honek ez du askorako balio, baina sarean zehar bidaltzen diren zenbait gauza baino askoz ere garrantzitsuagoa dela uste dut, zergatik ez dugu mezu hau Euskal Herri osoan eta Espainian eta Frantzian eta beste lurraldeetan zabaltzen hemen gaudela adieraziz, Euskaldunak garela eta harro gaudela, euskara maite dugula eta euskaraz bizi nahi dugula.
Mesedez, arren eskatzen dizut mezu hau ahalik eta jende gehienari bidal diezaiozun eta jasotzen duzunean idatzi dizunari itzul diezaiozue idatzitakoaren aldeko zarenaren adierazle; ez da asko kostatzen eta beharbada ez du emaitza askorik lortuko, baina saiatzen arren ez da ezer gertatzen eta nork daki behar bada egunen batean nire ametsak errealitate bihurtuko diren.