• e-hizketan,  hamaiK -hamaika kontu-

    Luistxo Fernandez: Gauzak asmatzeko ausardia behar da

    luis fernandez

    >baga) Blogaria zergatik?

    Euskarazko blog plataforma bat nola eratu zitekeen pentsatzen, norberak probatu behar makinariarekin lehenbizi, eta modu eleanitzean saiatu nintzen, alderdi teknikotik test interesgarria zelakoan. Eta halaxe hasi nintzen, asmo editorialik gabe.

    >biga) gaur egun, zeintzuk dira zure egitekoak, zelan uztartzen dituzu blogarekin?

    Internetera dedikatzen den enpresa batean, blogetan idazten eta blogak jarraitzen denbora asko ematen dut. Nire lana oso uztartuta dago blogintzarekin.

    >higa) euskarazko komunitate bat dagoenik esan daiteke? Zuk zeuk, zelan ikusten duzu?

    Euskaldun batzuk konektatuta daude elkarren artean Internet bidez. Blogen bidez ere bai. Baina blogen aurretik ere bai. Nahikoa da posta elektronikoa komunitate zentzu bat eratzeko; Eibartarrak zerrendaren kasuan ikusi dut nik ia hamar urtetan zehar.

    >laga) Irakurri, idatzi, erantzun, ikusi, jarraitu…Internet zer da zuretzat?

    Pasio dibertigarri bat

    >boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Eduki libre gehiago behar du. Konexio mugikorraren merketzea behar du. Gauzak asmatzeko ausardia behar da, baina baita inteligentzia, zortea eta indarra. Ez nago hain seguru ezer handia asmatuko dugunik. Zeozer asmatu dugu, baina, balio du edo balioko du? Ez dakit. Besteen asmakizunak gure fabore ondo erabiltzea ere ez litzateke txarra.


    >sega)
    Internet bidez, ezagutu duzu lagun onik, nor? non? noiz?

    Bat baino gehiago

    >zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Familiarekin oso gustura igarotzen ditut egun horiek.

    >zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Egunero ez dut irakurtzen, ez duelako egunero mezurik idazten, baina jario batzailean abisua ikusten dudanean, taka! klik egiten dut azkar azkar Wheylona kaliforniarraren blog donostiarrean.

    >bele)) Orain etiketa ezazu zure burua, zure jarduna… laupabost etiketa nahikoak izango al dira.

    asoziala

    >arma)) Nahi baduzu, bota zuk orain galdera, nik erantzungo dut zure partez, atsegin handiz.

    Zein izango da etorkizuneko euskarazko telebista?

    Ez da erraza asmatzen, baina Internet bidezko kanalak nagusituko dira, atoan gainera. Disko gogorra eta telebista pantaila elkarrekin daude etxe baten baino gehiago. iTunes, Apple TV eta abar hortik doaz. Eta iTunes-en basque jarrita… aspaldi emaitza bakarra dago: irratia.com
    Egia esan ez daukat telebistari ekiteko gogorik, baina Hamaika telebista proiektukoek, hobe lukete bai, Interneti gehiago so egingo baliote. Jende ona dago proiektu horretan, Internetekin harreman estua eta ona duena, eta pentsatu nahi  dut, ez dutela iparra galduko. Lizentzia digital lokalak eskuratu dituzte, baina Interneteko telebista euskaldunen sarea ere osatu beharko lukete, halabeharrez.
    ETB1 desagertze bidean da. Lehen haur programazioa+pilota+futbola+informatiboak zen. Futbola erori da, pilotarekin kasu (Asegarce+Bainet+Hamaika….), informatiboak ez omen ditu inork ikusten, eta haur programazio enlatatuarekin soilik ezin mantendu daiteke telebista bat. Goenkale eta Mihiluze ikusteko, hobe Interneten jartzen badituzte…. zinez.

    >tiro pUm! Nori egingo zenioke galdera sorta? E-lkarrizketa zeini egin proposatuidazu..

    Leire Narbaizari, Hasier Etxeberriari edo Goio Aranari.

  • e-hizketan,  hamaiK -hamaika kontu-

    Gorka Bereziartua: Euskarazko Wikipedia edukiz gainezka ikusi nahi nuke

    baga) Blogaria zergatik?

    Ordenagailu bat etxean duenak goizago edo beranduago erabiltzen hasteko
    arriskua duelako. Nik ez nuen arrisku hori kontuan izan eta begira, orain
    egun osoa pasatzen dut pantailaren aurrean. Beraz, hau irakurtzen duenak ez
    dezala esan ez diola inork abisatu!


    biga) gaur egun, zeintzuk dira zure egitekoak, zelan uztartzen dituzu
    blogarekin?

    Kazetaria naiz Argia aldizkarian, eta beste medio batzuetan ere kolaboratzen
    dut. Bloga ahal dudanean berritzen dut. Gainera bi kume elikatu behar,
    eremulauak eta nire bloga. Momentuaren arabera nabil batean edo bestean, eta
    egia esateko azken aldian nahiko nukeena baino gutxiago.


    higa) euskarazko komunitate bat dagoenik esan daiteke? Zuk zeuk, zelan
    ikusten duzu?

    Ez dakit komunitatea den hitza, baina sare batzuk badaude noski.
    Zabaldu.com-en inguruan, Sustatu-ren inguruan… Kontua da horiek talde
    “kontzientziatuak” direla nolabait. Baina hortik kanpo jende asko dabil
    sarean euskaraz, beste pretentsiorik gabe, zerbaiten parte sentitu gabe.
    Harrituta nago adibidez nire herrian fotologa zenbat jendek duen ikusita.
    Euskaraz ari dira horiek ere eta ziur askok ez dutela Sustatu edo Zabaldu
    ezagutzen. Eta horrek bere alde onak ditu (erakusten du jendea
    naturaltasunez ari dela euskaraz sarean) eta txarrak ere bai (proiektu
    handiagoak aurrera eramateko behar izaten delako kontzientzia maila bat duen
    jendea egotea).


    laga) Irakurri, idatzi, erantzun, ikusi, jarraitu… Internet zer da
    zuretzat?

    Oinetakoak bezala, eguneroko bizitzaren parte bat. Lan tresna neurri handi
    batean, informazio iturria noski eta entretenitzeko bidea ere bai.


    boga)
    Eta zer gehiago behar du, behar luke, zure gustuko Internetek…
    Ausartuko gara zeozer asmatzen?

    Zeozer berria asmatzeko ez naiz ni egokiena. Atzeko bagoiko internauta naiz,
    asmatutakoa erabiltzen ikasteko nahiko lan izaten duena.

    Beraz, nire ustez zer gehiago behar duen Internetek? Ba, adibidez,
    euskarazko Wikipedia edukiz gainezka ikusi nahi nuke. Lan handia egin du hor
    dabilen jendeak, baina jende gehiagok parte hartuko bagenu diferentzia
    ederrekoa izango litzateke. Eta hor lehenengo harria nire kopetera bota
    behar dut ni bainaiz edukirik sartu ez duen aurrenekoa.


    sega) Internet bidez, ezagutu duzu lagun onik, nor? non? noiz?

    Eremulauak-en inguruan jende dezente bildu ginen ekin genionean eta geroztik
    ere lagun berriak egin ditut. Dena dela, nahiago jendea aurrez aurre
    ezagutzea.


    zai) Internet gabeko egun bat kontaiguzu, zer egingo zenuke, goizean hasi
    eta gauerarte, hori posible ote den jakiteko irrikitan nago eta…

    Esnatu, makarrak kendu, dutxa, jantzi, kafea, irratia, autoa etab. Lanera
    iritsi eta idazten hasi. “Nola zen, hatxez edo gabe?” 600 tonako hiztegia.
    Ez dira hor bukatzen zalantzak: entziklopedia hartu, thessaurusa, estilo
    liburua eta Biblia (badaezpada). Iritsi naiz mahaira, nahiko ondo halere,
    bizkarra normala baino apur bat kurbatuagoa, besterik ez. Baina zerbait ez
    dabil. Entziklopedia, zaharkitua; erreferentzia faltan; hainbeste
    libururekin ez daukat ordenagailuarentzako lekurik ere. Olivetti batekin
    hasi naiz, gutxiago okupatzen duelako-eta. Bizarra egin izan banu. Atzoko
    egunkarian Zumalakarregiren berri. Ezer onik ez gerra parteak. Zaldiak
    trostan eraman nau etxera bazkaltzera. Atzamarrak miazkatu ditut zerrikia
    bukatzean eta egurrezko godaleta tragoan hustu. Ilea hazten ari, besoetan,
    masailetatik gora. Atzera lantokira. Lan egin behar dela, egon hadi geldi!
    Zergatik ari haiz horman zaldiak marrazten? Egin ezak probetxuzko zerbait,
    sua edo. Lankideek arraro begiratzen didatela uste dut. Baina ez nago
    seguru, ez baititut ondo ikusten hemen goian beso bakarraz helduta adarretik
    zintzilik nagoela. Hurbildu naiz ba, eta orduan eta arraroago begiratu
    didate. “Ez ba, nola izango dut nahiago bi hanketan ibiltzea? Sartu zure
    kontuetan aizu!”. Bueno, eta horrela izaki unizelular bihurtu arte, gutxi
    gora behera (Big Bang-eraino atzera egitea aukerazkoa da, kreazionistek
    mesedez alboko leihatilan galdetu).


    zoi) Webgune bat gomendatuiguzu, egunero irakurtzen duzun blog bat, besteok
    ere horren berri izan dezagun.

    www.papelcontinuo.net jarraitzen dut. Gauza interesgarriak jartzen dituzte,
    nahiz eta batzuetan bizarroegia ere bihurtzen den. Eta noski, geroz eta
    grazia gehiago egiten didate Marrapuntun jartzen dituzten gauzek (“Euskal
    Herriko patila”-ren tankerako inkestak, bua!). Euskal Nerd-tasuna
    bultzatzeko egiten ari diren ahalegina benetan txalogarria da.


    bele)) Orain etiketa ezazu zure burua, zure jarduna… laupabost etiketa
    nahikoak izango al dira.

    Horra, EU & EN

    1- dabilen 1- rolling
    2- harriak 2- stone
    3- goroldiorik 3- gathers
    4- biltzen 4- no
    5- ez 5- moss


    arma)) Nahi baduzu, bota zuk orain galdera, nik erantzungo dut zure partez,
    atsegin handiz.

    Nik uste mundu guztiak noizbait galdetu nahi izan dizun zerbait dela hau:
    Kazetaria, blogaria, aktibista… Zenbat ordu ditu zure egunak denetara
    iristeko?

     

    • Gorka, nire egunek ere 24 ordu dituzte. Iritsi ez dakit, baina zenbat gauza ditugun egiteke pentsatze hutsak gehiago nekatzen nau.


    tiro pUm! Nori egingo diot hurrengo galdera sorta? E-lkarrizketa zeini egin
    proposatuidazu.. itaunok berari igortzeko.

    http://murgilduta.net-eko Julen-ek ziur oso gauza interesgarriak kontatuko
    dituela.


  • e-hizketan,  hamaiK -hamaika kontu-

    Igotz Ziarreta: Mundua ikusteko aukera da Internet, munduak zu ikusteko

    igotz ziarreta  igotz.org

    baga) Blogaria zergatik?

    Hori nik ere jakin nahi nuke, suposatzen dut aukera ematen duelako egindako lana erakusteko.

    biga) gaur egun, zeintzuk dira zure egitekoak, zelan uztartzen dituzu blogarekin?

    Egunero, bai Bartzelonako Euskal Etxean, bai informatikako irakasle lanean, bai studioan diseinatzen beti ordenagailuen aurrean mugitzen naiz, beti daukat aukera blogean idazteko. Zailagoa da bertan erakutsi nahi dudana sortzea.

    higa) euskarazko komunitate bat dagoenik esan daiteke? Zuk zeuk, zelan ikusten duzu?

    Eztakit, nik euskaraz idazten dut nere hizkuntza delako eta horrela irtetzen zaidalako, saiatzen naiz katalanera itzultzea baina batzutan “ahaztu” egiten zait.
    laga) Irakurri, idatzi, erantzun, ikusi, jarraitu…Internet zer da zuretzat?,1] ); D([“mb”,”Mundua ikusteko aukera ematen duen bidea, eta munduak zu ikusteko duzun bidea\u003cspan style\u003d\”font-weight:bold\”\>\u003cspan style\u003d\”font-weight:bold\”\>\u003cspan style\u003d\”font-weight:bold\”\>\u003cspan style\u003d\”font-weight:bold\”\>\u003c/span\>\n\u003cbr\>\u003cbr\>\u003c/span\>\u003c/span\>boga)\u003c/span\> Eta zer gehiago behar du, behar luke, zure gustuko Internetek… Ausartuko gara zeozer asmatzen?\u003cbr\>\u003cbr\>Benetako anonimatoa, zoritzarrez ezinezkoa dena.\u003cspan style\u003d\”font-weight:bold\”\>\u003cspan style\u003d\”font-weight:bold\”\>\n\u003cspan style\u003d\”font-weight:bold\”\>\u003c/span\>\u003cbr\>\u003cbr\>\u003c/span\>sega)\u003c/span\> Internet bidez, ezagutu duzu lagun onik, nor? non? noiz?\n\u003cbr\>\u003cbr\>kar kar kar asko, edonon, beti.”,1] ); D([“mb”,”\u003cspan class\u003dq\>\u003cbr\>\u003cbr\>\u003cspan style\u003d\”font-weight:bold\”\>zai)\u003c/span\> Internet gabeko\negun bat kontaiguzu, zer egingo zenuke, goizean hasi eta gauerarte,\nhori posible ote den jakiteko irrikitan nago eta…\u003cbr\>\u003cbr\>\u003c/span\>”,1] ); //–>

    laga)
    Irakurri, idatzi, erantzun, ikusi, jarraitu…Internet zer da zuretzat?

    Mundua ikusteko aukera ematen duen bidea, eta munduak zu ikusteko duzun bidea.

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Benetako anonimatoa, zoritxarrez ezinezkoa dena.

    sega) Internet bidez, ezagutu duzu lagun onik, nor? non? noiz?

    kar kar kar asko, edonon, beti.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Batzutan behartu egiten naiz Internet gabe egotera. Askotan denbora asko galtzen baita helmugarik gabeko bide batean. Normalean informatika, argazkilaritza edo diseinu liburuak irakurtzen ematen ditut Internet gabeko egunak.

    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Egia esan eztaukat egunero irakurtzen dudan blogik, zabaldu.comera edo GAUR8.infora satzen naiz [hauetara bai egunero] ea gauza interesgarririk aurkitzen dudan.

    bele)) Orain etiketa ezazu zure burua, zure jarduna… laupabost etiketa nahikoak izango al dira.

    Ametsa, diseinua, argazkiak, bartzelona, independentzia

    arma)) Nahi baduzu, bota zuk orain galdera, nik erantzungo dut zure partez, atsegin handiz.

    Zer egin daiteke, irratia.com proiektuan laguntzeko, beste proiekturik buruan?

    • Interesgarria benetan Igotz. Irrati partehartzeileagoa egin gura genuke. Munduko euskaldunak batu gura ditugu gurean, podcast hauek munduan barrena ere entzun daitezen. BTZNko korrespontsal izendatuko zaitugu, gura baduzu.
    • Proiektuak? Podcast munduan murgiltzeko asmotan nago. Etxe azpiko txokoan, Internet_Irrati_studio ttiki bat antolatzen ari naiz, etxeko wifiari eskerrak.


    tiro pUm! Nori egingo diot hurrengo galdera sorta? e-lkarrizketa zeini egin proposatuidazu.. itaunok berari igortzeko.

    Ander Elortzari egingo nizkioke galdera hauek, oraindik probatan dagoen www.munduarimundo.com blogean bere australiarako bidaiaren berri emango digu. Bertan dokumental bat grabatzera joango da.

  • e-hizketan,  hamaiK -hamaika kontu-

    Teketen: Euskarazko edukiak Interneten konplexurik gabe sortuko dituzten pertsonak behar ditugu

    teketen

    baga) Blogaria zergatik?

    Kontatzen ez diren gauzak kontatzeko sortu nuen, nire gogoak eta grinak besteekin banatzeko eta besteek egindako aportazio eta elkarrizketarekin aberasteko. Gaur egun nire Interneteko izaera eta sorkuntzaren nodo zentrala ere badela esango nuke.

    biga) gaur egun, zeintzuk dira zure egitekoak, zelan uztartzen dituzu blogarekin?

    Web aplikazioen garapenean eta informatikarekin zerikusia duten gai berrietan ikasten eta irakasten dut Elurnet enpresa txiki bezain interesgarrian. Lan hauetako batzuetatik ikasi eta blogera eramaten dut eta alderantziz, lan hauetako batzuek egiteko blogintzan sortutako jakintza aplikatzen dut. Erabat konplementarioak zaizkit biak, batzuetan banan ezin diren bi alderdi ere izatera iritsi dira.

    higa) euskarazko komunitate bat dagoenik esan daiteke? Zuk zeuk, zelan ikusten duzu?

    Euskarazko komunitatea badago eta ez dut dudarik. Eztabaidatu dezakegu baina zer den komunitate bat. Komunitate bat gauzak elkarrekin egiteko elkar ezagutu, jarraitu eta lotzen diren pertsonak badira ez dut dudarik badagoela. Beharbada norbaitek dudan jarri dezake asko edo gutxi garen baina komunitatea badago. Gainera komunitate horren ingurunean pertsona gehiago dago banandurik komunitatean parte hartu ez baina hein batean parte sentitzen direnak. Komunitateak parte hartzen duten pertsonek osatzen badute ezin izan daiteke oso handia, ezagutzen al duzu espainiarren komunitaterik? Berriro hasierara bueltatuz, zer da komunitatea?

    Egotekotan ez bakarrik bat euskarazko komunitateak denak nonbait elkarren arteko talkak eta loturak dituzte askotan. Zabaldu.com, Sustatu.com, Blogari.net, Blogak.com, Nireblog.com (eta plataforma euskarazkoa ez baina euskaraz egiten duten asko), Librezale.org, Indymedia Euskal Herria, Blogosfera jeltzalea, Wikipedia euskalduna, herrietako aldizkari euskaldunen inguruko komunitateak, etab. Denetan ez daude pertsona berdinak nahiz eta batzuk bat baino gehiagotan egon. Nonbait momentu konkretuetan bada ere komunitate txiki hauek (niretzako sareak) elkarren arteko loturak edo talkak egiten dituzte eta komunitatea baino beharbada sare txikien sare handiago bat osatzen dute. Elkarren artean ezagutaraziko bideak ematen dituzten pertsonak edota proiektuak dira komunitate zabal bat izateko garrantzizko tresnak.

    Eta hala ere komunitatetik kanpo ere bizitza dago, euskaraz jakin bai baina sarean egiten ez duten jende interesgarri asko, my space edota msn spaces-etan dabiltzan gazteak, irakurri bakarrik egiten duten erabiltzaileak etab. Aukera guzti horiek egon badaude eta bakoitzak erabakitzen du, gurera biltzea nahi badugu erakarri beharko ditugu, baina bitartean hor daude eta hori ere ondo dago.

    laga) Irakurri, idatzi, erantzun, ikusi, jarraitu…Internet zer da zuretzat?

    Irakurri, aztertu, lan, sortu, disfrutatu, estresatu, bildu, elkartu, idatzi, esan, egin, egon. Nire bizitzaren beste atal bat.

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Mugikortasun gehiago edozein tokitan konexioa izateko aukera.

    Sozialago izatea, baliabide teknologiko hauek gure egunerokotasunean herriaren mesedetarako erabiltzeko aukera ematea.

    Euskarazko edukiak Interneten konplexurik gabe sortuko dituzten pertsonak izatea.

    Jakintza banatu, elkartu, zabaldu, moztu, lotu, elkartu, elkarbanatzeko oztoporik jartzen ez duten bideak eta batez ere horientzako oztopo ez diren pertsona, lege, erakundeak.

    sega) Internet bidez, ezagutu duzu lagun onik, nor? non? noiz?

    Zu, lehenengo ahotsez irratia.com-en, gero internet bidez eta pertsonalki edo alderantziz? Neurri espazio tenporalak ez ditut ondo kontrolatzen.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Goiz esnatu, ondo gosaldu tortila bat edo ahal denean, txango bat ematera irten Zumaiara (txarra egiten badu etxean irakurtzen gelditu). Ondoren bazkaldu eserita lekuren batean menu bat edo lagunen baten etxean. Arratsaldean siesta bota eta kalera pasiatzera atera (txarra egiten badu zinera). Gau partean neskarekin etxera joan edota astebukaera bada lagunekin parranda pixka bat egitera atera.

    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Consultoria artesana en la red (http://artesaniaenred.blogspot.com/). Jorratzen dituen gaiak pentsarazi egiten naute eta ba al dago gaur egun gauza interesgarriagorik? oharra: kontuz gaztelera zitalez 😉

    bele)) Orain etiketa ezazu zure burua, zure jarduna… laupabost etiketa nahikoak izango al dira.

    hiper(h)aktiboa, gertukoa, komunikatiboa, euskalduna, gorria (baina hau besteek egiten dute hobeto, Euskal Herriko kirol nazionala da etiketak jartzearena horregatik bai garela 2.0)

    arma)) Nahi baduzu, bota zuk orain galdera, nik erantzungo dut zure partez, atsegin handiz.

    Imaginatu galdutako gauza guztiak dauden leku bat badagoela eta kalean zoazela Larrabetzuko kultur etxe alderantz zubia zeharkatzen ari zarela behe laino lodi batek bertara eraman zaituela. Zer gustatuko litzaizuke bertan topatzea?

    tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.

    David Gonzalez (ketari)


  • e-hizketan,  hamaiK -hamaika kontu-

    Imanol Murua: zergatik daude EAJko hainbeste blogari eta ezker abertzaleko hain gutxi?

    Imanol Murua
    baga) Blogaria zergatik?

    Lanarekin lotura zuzena duen bloga da nirea eta, beraz, lanbidearekin
    lotua dago blogari izateko zergatia ere. Hitz gutxitan esanda: arau
    zurrun samarrekin idatzi beharra dugu paperean, nolabait esatearren
    kazetaritza tradizionalaren irizpideen barruan. Blogak libreago
    aritzeko aukera ematen dit eta, bidez batez, erantzunen bidez
    irakurleei tenperatura hartzeko aukera ere bai.

    biga) gaur egun, zeintzuk dira zure egitekoak, zelan uztartzen dituzu
    blogarekin?

    Nire lehentasuna papereko ediziorako lana da. “Lanaren barruko
    aisialdia” bezala da bloga. Atseden txiki bat, lan astunagoaren
    barruan. Eta, egia esan. blogari ez daukat denbora askorik eskaini
    beharrik, bestela egin ohi dudan lanetik elikatzeko aukera baitaukat.
    Elkarrizketa bat egin dudala papererako? Galderak prestatzen, bidaian
    joan-etorrian, grabatzen, transkribatzen, erredaktatzen… Hamalau ordu
    igual behar ditut. Blogean komentario osagarri bat sartzeko, aldiz,
    hamar minutu nahikoa dira.

    higa) euskarazko komunitate bat dagoenik esan daiteke? Zuk zeuk, zelan
    ikusten duzu?

    Jakina badagoela euskarazko komunitatea. Baina ez naiz baten batek
    metablogging-a esan dion horretan aritzeko oso zale. Nahiago dut
    blogosferan jardun, blogosferaz jardun baino.

    laga) Irakurri, idatzi, erantzun, ikusi, jarraitu…Internet zer da
    zuretzat?

    Informazio kutxa erraldoi bat, apur bat desordenatua (nire erruz,
    neurri handi batean, tresnak ez baititut behar bezala ezagutzen).
    Internet bidez jakin dut, adibidez, estimatzen dudan lagun batek
    istripu latza izan duela A-8an eta, zorionez, onik atera dela.

    boga) Eta zer gehiago behar du, behar luke, zure gustuko Internetek…
    Ausartuko gara zeozer asmatzen?

    Internet-ik ez zegoen garaiko informazioa digitalizatzeko ekimen
    gehiago, adibidez. Armiarma.com-en moduko gehiago, alegia.

    sega) Internet bidez, ezagutu duzu lagun onik, nor? non? noiz?

    Jendea ezagutu dut: blogariak, nire blogean erantzuten dutenak… Baina
    lagun onak, Internet bitartez, egia esanda, ez.

    zai) Internet gabeko egun bat kontaiguzu, zer egingo zenuke, goizean
    hasi eta gauerarte, hori posible ote den jakiteko irrikitan nago eta…

    Jakina posible dela. Lan egunetan, ezinezkoa. Baina jai eguna izatea
    eta plan on bat edukitzea aski izan daiteke Interneten sartu gabe
    egiteko egun osoa.

    zoi) Webgune bat gomendatuiguzu, egunero irakurtzen duzun blog bat,
    besteok ere horren berri izan dezagun.

    Politika kontuak jarraitzeko zer blog begiratzen ditudan esan beharko
    nizuke, baina egia esan, blog politiko interesgarri gutxi topatu dut.
    Politikarien artean aktiboena, dudarik gabe, Iñaki Anasagasti da
    (www.ianasagasti.blogs.com). Inoiz berarekin topo eginez gero, ez nioke
    ezertaz hitz erdirik esango, nik esandakoa bere blogean argitaratuta
    ikusi nahiko ez banu behintzat. Alegia, (komeni zaion) dena kontatzen
    du.

    bele)) Orain etiketa ezazu zure burua, zure jarduna… laupabost
    etiketa nahikoak izango al dira.

    Zalantza, enpatia, zalantza, independentzia.

    arma)) Nahi baduzu, bota zuk orain galdera, nik erantzungo dut zure
    partez, atsegin handiz.

    Bi galdera, zure baimenarekin. Baga: zergatik daude, zure ustez, EAJko
    hainbeste blogari, politikari buruz eztabaidan (arabatik, gipuzkoatik,
    izaronews, izaronius…), eta ezker abertzaleko hain gutxi —nik ez ditut
    topatzen behintzat—? Biga: zer moduz, istripu latzaren ondoren?

    * Galdera oso interesgarria, Imanol. Hipotesi batzuk botako ditut, neure kasa eta boteprontoan. PNVk bizi duen egoera berezia da, nik ez nuen EAren banaketa gertutik bizi izan, baina oraingo krisi hau bideratzeko, elikatzeko, hedatzeko bloga hautatu dute jelkide askok. Egia esan, oso alderdi bertikala da, eta nolabait behetik lehertzen ari da egoera hori. PNVko kideen blog asko dago, baina gehienak gaztelaniaz gainera. Bitxia da hori ere.
    Ezker abertzaleko hain gutxi? Egia esan  blogak gutxi dira, baina blog kolektiboak, herriz herri dexente daude. Egia da, kotileo politiko gutxi lantzen dela, zurrumurrutegiak ez du funtzionatzen horrenbeste ezker abertzalean. Asanbladak, funtzionamendua eta partehartzea irekia da, berez barne eztabaiden berri izateko ez da blogik behar. Nik ere nahi nuke ezker abertzaleko jendeak gehiago idatziko balu blogetan, partehartze aktiboagoa Interneten. Baina jendeak kezka asko ditu, nork bere herri eta auzoan. Baina galdera titularrarera eraman dut apropos, ea jendeak zer dioen, zer uste duen jakiteko.

    *Eta ni ondo nago, ikusten duzu.

    tiro pUm! Nori egingo diot hurrengo galdera sorta? E-lkarrizketa zeini
    egin proposatuidazu.. itaunok berari igortzeko.

    Bosco Garciari.

  • e-hizketan,  hamaiK -hamaika kontu-

    Katixa Agirre: “Batzuentzat bloga da euskaraz aritzeko leku bakarra”

     

    baga) Blogaria zergatik?
    Dibertigarria delako, eta zure txokotxo propioa izatea ahalbidetzen dizulako, alegia, protagonismo apur bat eskuratzea.

    biga) gaur egun, zeintzuk dira zure egitekoak, zelan uztartzen dituzu blogarekin?
    Ordenagailu aurrean ordu ugari pasatzen ditudanez, erraza da blogen munduan erortzea behin edo behin, besteenak irakurtzeko eta baita norberaren blogean idazteko ere. Egia da (hau aitortu beharko dut) prentsarako-eta idazten ditudan beste artikuluak birziklatzen ditudala blogerako.

    higa) euskarazko komunitate bat dagoenik esan daiteke? Zuk zeuk, zelan ikusten duzu?
    Noski badagoela, eta handia dela esan daiteke. Nik badakit (tartean lagun batzuk ditudalako) zenbait pertsonentzat bloga dela euskaraz aritzen diren leku bakarra. Beraz, beste aukerarik ez dutenentzat euskaraz egiteko eremu bat sortu dugu, eta eremu txukuna da, egunero gauza interesgarriak topa baitaitezke.

    laga) Irakurri, idatzi, erantzun, ikusi, jarraitu…Internet zer da zuretzat?
    Nire munduaren zati bat, munduarekin harremanetan egoteko tresna inportantea. Aipatzen dituzun aditz horiek guztiak eramaten ditut aurrera.

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?
    Benetan mundu guztira zabaltzea. Ez gaitezela geratu internautaren profil tipikoarekin: gizona, gaztea, maila kultur zehatz batekoa, lehenengo mundukoa eta abar.

    sega) Internet bidez, ezagutu duzu lagun onik, nor? non? noiz?
    Bai, noski, baina nik ez dut nire lagunak klasifikatzen non ezagutu ditudanaren arabera. Ez dakit zergatik oraindik harritzen garen jakitean ez dakit nork bere bikotea ezagutu duela internet bidez. Niretzat internet jende arteko harremanak garatzeko beste toki bat da.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…
    Posible da, bai, nik internet gabeko egunak pasa ditut uda honetan bertan. Altxatu, gosari ederra, gero hondartzara, bainatzera, eguzkia hartzera; paseo bat ezagutzen ez duzun herri batean, lagunekin hitz egitea, zerbeza hotz bat, izarren pean afaltzea… Deskonektatzeko gogoak piztu zaizkit! Baina galdetegiarekin jarraituko dut, lasai.

    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.
    Egunero www.javierortiz.net irakurtzen dut, adibidez, artikulu zorrotzak idazten dituelako, eta badakidalako goizero zerbait berria eskainiko digula. Neatorama.com gunea ere bisitatzen dut, gauza frikiak ikusteko.

    bele)) Orain etiketa ezazu zure burua, zure jarduna… laupabost etiketa nahikoak izango al dira.
    idaztea siesta txapela_buruan INEM

    arma)) Nahi baduzu, bota zuk orain galdera, nik erantzungo dut zure partez, atsegin handiz.
    Aita zaren aldetik, zein adinetatik aurrera uste duzu komenigarria dela ume batentzat Interneteko saltsan sartzea? Umeen ziber-jarduna kontrolatzearen alde zaude?

    Katixa, egia esan ez dakit. Galdetuko diot nire amari, ia Interneten sartzeko baimenik eman didan inoiz. Baina telebista baino osasuntsuagoa deritzot sareen sare honi. Kontrolaz, oso gauza polita irakurri berri dut ikteroen blogean. Ordenagailuak, seme-alabak eta Internet. Bizirauteko gida.

    tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.
    Patxi Lurrari, blogari kuttuna delako.

  • e-hizketan,  hamaiK -hamaika kontu-

    Joxe Rojas: “Ez dakit euskarazkoa komunitatea edo kuadrilatxoa den”


    joxe rojas teknopata

    baga) Blogaria zergatik?

    Gehienbat frikismo kontuagatik. Teknopatiaren ajeak, badakizu: lehenengo Internet sarbidea kontratatzean, konexioarekin batera webgunea ostatzeko txokotxoa ere eman zidaten… hura hutsik ez egoteko web orriak egiten ikasi (eta egiteari ekin), orriak denborarekin pertsonalitate propioa garatzen hasi… eta hortik aurrera tira, lehengo webgunetik oraingo blogerako bilakaera berez etorri da. Blogak ematen dizuna webgunea egunean erraz mantentzeko modua da, sarrera bat sartzen duzun bakoitzean zure guneko beste sarrera guztietako loturak eskuz aldatu behar ez izatea…

    biga) gaur egun, zeintzuk dira zure egitekoak, zelan uztartzen dituzu blogarekin?

    Urtebete egin dut duela gutxi Topagunean, Euskara Elkarteen Federazioan, hedabide saileko sustatzaile lanetan, batez ere herri aldizkariekin nago harremanetan. Oraindik nire burua kokatzen nabil: aldizkariak asko dira, eta oso ezberdinak, eta horrenbeste lan dago egiteko non zail egiten den nondik hasi erabakitzea… eta beno, bloga lehenagotik dator, berez ez du zerikusi handirik lanarekin. Hala ere, gertatzen da lanean ordu asko pasatzen direla, eta beno, segun eta zertan zabiltzan, ba horrek zure interesguneak ere alde batera edo bestera mugiarazten dituela. Euskara irakasle ibili naizen urteetan gehiago fijatu naiz horren zerikusia zuten kontuetan. Orain berriz, lanean hedabideen eta komunikazioaren inguruko informazio piloa jasotzen dut, eta tartean behin sartzen dut alde horretatik interesgarria iruditzen zaidan zerbait…

    higa) euskarazko komunitate bat dagoenik esan daiteke? Zuk zeuk, zelan ikusten duzu?

    Hori beharbada kanpotik esan beharko luke baten batek. Kopuruei begiratuta badirudi baietz, mugimendua badagoela alor horretan, eta beste batzuetan ez bezala, oraingoan trena garaiz hartu dugula euskaldunok. Baina ez dakit dagoena komunitatea edo koadrilatxoa den. Esan nahi dut: azkenean beti ikusten ditut izen berberak gauza hauekin lotutako kontuetan, eta izen berriren bat agertzen den momentuan, betiko beste izen horiek aztoratu egiten dira/gara, koadrilan egon eta ezezagunen bat sua eskatzen datorrenean bezala. Badinotsut: nik denbora pixka bat utziko nuke pasatzen, eta kanpotik ikusten gaituen baten bati galdetuko nioke hori.

    laga) Irakurri, idatzi, erantzun, ikusi, jarraitu…Internet zer da zuretzat?

    Adibide matxista samarra irtengo zait beharbada, barkatu! Baina begira, txikitan amak sukaldeko leihoa nola erabiltzen zuen? Bada, hori, baina proportzio globaletara eramanda: bertatik hitz egiten zuen auzokoarekin, eta azkenengo zurrumurruak jaso eta zabaldu egiten zituen, bertatik deitzen zigun gu jolasean ‘urrun’ genbiltzanean, enkarguak agintzen zizkigun, afiladorea, butaneroa, esne saltzailea, okina pasatzen zirenean bertatik deitzen zien, aspertuta zegoenean bertatik begira ematen zuen denbora… …bada, horixe, baina mundu mailako proportzioan.

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Leiho global horretan hizkuntzek suposatzen duten ‘arazoa’ gainditzen laguntzeko tresnak behar dira. Aldibereko itzulpenen teknologiak garatu behar direla uste dut.

    sega) Internet bidez, ezagutu duzu lagun onik, nor? non? noiz?

    Bai, garai batean ‘txatealari’ amorratua ere izan nintzen, eta lagun batzuk egin ditut internet bidez. Topaketarik bitxiena ‘Mac OS X Euskaraz‘ proiektuaren kontura etorri zen beharbada. Egun batean, kasualitatez jakin nuen bazegoela beste zoro bat, Txabi, Appleren sistema euskaratzen. Denbora piloa eman genuen artxiboak trukatzen eta elkarren itzulpenak hobetzen, eta horri esker sortu ahal izan ziren sistema euskaratzeko paketa haiek. Komunikazioa erabat elektronikoa izan zen denbora guztian harik eta ETBtik deitu zuten arte, Appleren debekuaren berri emateko. Igual sei hilabete edo gehiago egunero bizpahiru email trukatzen, eta aurrez aurre geratu ginen lehenengo aldia zertarako eta telebistara joateko izan zen. Horretan bertan oso kontu bitxi eta barregarria izan zen.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Bada, internet gabeko egun bat oporrekin lotzen dut zuzenean: berandu altxatu, paperezko egunkaria irakurri croissant eta kafesne baten aurrean… bueltatxo bat eman eta bazkarirako zerbait prestatu, bazkalostean duintasun guztia galdu telebistaren aurreko sofako siesta luze horietako batekin, ahotik lerdea darizula… arratsaldean bueltatxo bat parkera ilobarekin, eta hor ere duintasuna berriro galdu haren atzetik kolunpioetatik korrika eta oihuka… eta gauean afari on bat lagunekin, patxadaz egindako horietako bat, afalostea goizaldeko 4ak arte luzatzen den horietakoa, pattarrez ondo bustia, eta kontatzeko, entzuteko, barre zein negar egiteko tarteak dituen horietakoak…

    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Poynter online. Kazetaritzaren inguruko webgunea da. Oso estatubatuarra, bai, baina batzuetan oso perla interesgarriak aurkitzen dira hor. Azken boladan Twitterrek kazetaritzarako izan dezakeen balioaz dabiltza eztabaidatzen….

    bele)) Orain etiketa ezazu zure burua, zure jarduna… laupabost etiketa nahikoak izango al dira.

    teknopata, hedabideak, komunikazioa, euskaraz

    arma)) Nahi baduzu, bota zuk orain galdera, nik erantzungo dut zure partez, atsegin handiz.

    Hamaika saltsatan zaude sartuta beti… nondik/nola ateratzen duzu denbora danetarako? Zer sakrifikatu behar izan duzu?

    Hamaika? Ez zait iruditzen. Esku bakar batekin zenbatuko nituzke nire egitekoak gaur egun. Loari ezin kendu, lanari esatea ez dago ondo… esango dugu literaturari kentzen dizkiodala orduak gustuko ditudan egitekoak egiteko. Eta jarrera militante bat izateak, asko laguntzen du.

    tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.

    Nik Vicent Partali egingo nizkioke, baina ez dakit erronda honen ‘laginetik kanpo’ geratzen den. Bestela, Benito Fizi.

  • e-hizketan,  hamaiK -hamaika kontu-

    Hasier Etxeberria: “Ederra litzateke zintzotasunaren araberako kategorizazioa egingo lukeen zerbait”

    Hasier Etxeberria
    baga) Blogaria zergatik?
    Neuk ere ez daukat argi. Esan dezagun atsegin dudala saltsa eta lagundu egiten didala sorkuntza lanetan. Orohar, gainera, maczalea naizenez, beti ukan dut tripetan ibiltzeko joera.

    biga) gaur egun, zeintzuk dira zure egitekoak, zelan uztartzen dituzu blogarekin?
    Gogoak eman ahala idazten dut, astean hiru-lautan. Lagundu egiten dit errealitateari zehatzago behatzen. Bestalde, egiten dudan gehienaren bilduma izateko ere sortua da bloga, desordenatua bainaiz paperekin. Hortxe ditut neure artxiborik gehienak, saran, munduko edozein ordenadoretik neure eskura: artikuluak, gogoetak, iritziak, liburu osoak, proiektu hasi beriak… edonongo bazterretan ekin diezaioket lanari, hala erabaki ezkero.

    higa) euskarazko komunitate bat dagoenik esan daiteke? Zuk zeuk, zelan ikusten duzu?
    Izatekotan, Sustaturen inguruan eta, nire kasuan armiarmaren inguruan. Zelabaiteko zerbait bada, bai.

    laga) Irakurri, idatzi, erantzun, ikusi, jarraitu…Internet zer da zuretzat?
    Informatzeko bidea, batez ere. Errekreatzekoa ere bai, zenbaitetan.

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?
    Dudarik gabe euskararen presentzia handiagoa. Ederra litzateke, halaber, zintzotasunaren araberako kategorizazioa egingo lukeen zerbait, kaka azken lekura botako lukeena eta urrea aurrera. Baina ni ez naiz inor, jauna.

    sega) Internet bidez, ezagutu duzu lagun onik, nor? non? noiz?
    Posta elektronikoaren bidez bai. Lagun bat egin nuen, geroago neure lankide egin nuena. Duela bost urte edo.
    Mexikon ere egin dut lagun bat blogaren bidez, DFko La Jornada egunkarian idaztea proposatu didana. Alonso Ruvalcaba du izenahttp://antrobiotics.blogspot.com/ eta erdi zoraturik dago. Idazle fina da. Elkar ikustekotan gara, han edo hemen.
    Mikel Iturria ere blogak direla medio ezagutu dut.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…
    Ez dut arazorik liburu eder batekin arbolapean etzanda egon eta hura amaitu artean Internet ahazteko. Baita astebetez ere. Ez naiz dirudi dudan bezain lerdoa.
    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.
    Doako gomendioak neure blogetan bakarrik ematen ditut. Beraz alua mundua euskaraz eta glotonia gaztelaniaz.

    bele)) Orain etiketa ezazu zure burua, zure jarduna… laupabost etiketa nahikoak izango al dira.
    Saltsero letrazale mokogozo zazpiki bat.

    arma)) Nahi baduzu, bota zuk orain galdera, nik erantzungo dut zure partez, atsegin handiz.
    Zer arraiotarako behar dira ordenadore eramangarriak bazter guztietan ordenadore tinkoak baldin badaude?

    tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.
    Mikel Iturriari.

  • e-hizketan,  hamaiK -hamaika kontu-

    Iban Arantzabal: “Internetek euskara gehiago behar du, gehiago eta gehiago”

    Iban Arantzabal

    baga) Blogaria zergatik?

    Papera probatua dut. Lehenengo irratian jardun nuen, denborarekin telebistan aterrizatu dut eta azkenengo 6-7 urtean Interneten murgilduta nenbilen… Sustatun lanean hasi nintzenetik hemen edo han egin ditut sartu-irtenak. Orain ni izango naiz nire buruaren zentsore, editore, kritikari, iritzi-emale… Gura dudanean, gura dudan moduan eta harri handi bat gainean izan barik. Hori dana egin daiteke blog batekin. Zergatik ez blogari? Denbora kontua zen.


    biga) gaur egun, zeintzuk dira zure egitekoak, zelan uztartzen dituzu blogarekin?

    Komunikazio enpresa ilusionante baten dihardut lanean, Goiena omunikazio Zerbitzuak Koop. Elkartean. Irratian, telebistan eta Interneten jarduten dut gehien eta baita paperean ere. Zuzendaritza taldeko kide naiz eta nire egitekoa, gainontzeko lankideenarekin batera, euskara hutsezko komunikabide erreferente izaten jarraitzen
    laguntzea da: http://www.goiena.com/goienakoop/misioa Bloga pertsonala da eta lanetik ez elikatzea hautua izan da. Telebista gutxiago ikustea erabaki dut eta ordu horiek liburuei eta blogari eskaintzea.


    higa) euskarazko komunitate bat dagoenik esan daiteke? Zuk zeuk, zelan ikusten duzu?

    Horixe baietz! Euskaldunok beti hil kanpaiak jotzen jarduten dugu.
    Gustatzen zait tonu positiboagoan jardutea. 5465 blog daude euskaraz: komunitateak hainbat daude eta horiek guztiak ondo baiño hobeto kusten ditut errepresentatuak aurki.com-en. Asko gara eta gero eta gehiago. Arantzabal.com beste harri txiki bat da 5465 horiek + bat.


    laga) Irakurri, idatzi, erantzun, ikusi, jarraitu… Internet zer da zuretzat?

    Horiek denak dira. Komunikatzeko tresna izugarri ona, bizia eta raginkorra da. Lagun askoren iritziak irakurtzen ditut, erantzun eta idatzi ere bai batzuk, jarraitzen ditut informazio iturriak feed irakurgailuaren bidez, skype asko erabiltzen dut, argazkiak sareratzen ditut… pentsa, kuadrillako afarietarako ere kuadrillako blogean eman behar izaten dut izena. Oso praktikoa da Internet eta orain erraztasunean asko ari da garatzen. Nik ere horrenbeste gauza egiten ikasi dut…


    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Oraindik ere pisu idazten dugu. Oraindik ere pentsatzen dugu blogak idazleek elikatu beharrekoak direla. Oraindik “h”-ak ondo idazten dakizkien jendearendako direla pentsatzen duenik badago eta ez! h-ak leku okerrean idatzitako blog gehiago baleude hobeto! Komunitatea handitzea garrantzitsua da euskararentzat eta kalitateaz ere jardutea txarto egon ez arren kantitatearen aldagaia beti izango da oso garrantzitsua. Internetek euskara gehiago behar du, gehiago eta gehiago.

    sega) Internet bidez, ezagutu duzu lagun onik, nor? non? noiz?

    Interneten biluztu diren lagunak ditut. Ni lotsatiagoa naiz.
    Komunikatzea miresten dut, baina dena kontatzearekin ez dago lotuta, ezta? 🙂


    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Ufff. Egun asko dira horrelakoak. Nireak lotura handia izaten du lagunekin gozatzearekin, neskalagunarekin, Espaloia Kafe Antzokian jardutearekin, herrian inplikatzearekin… Eta bai, telebista ikustearekin, plazako bankuan jarrita egotearekin, pipak jatearekin… Hain da normala nire bizitzako egun bat…


    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Nire gusturako gutxiegi idazten duen arren ;-( badut lagun bat maite dudana eta baita bere bloga ere: Askok ezagutuko duzue eta tonu hori da erakartzen nauena.
    Zerikusirik ez duen arren tonu horrekin, eibartarrak zerrenda da beste irakurketa gustuko bat. Blogeko Amatiño baiño gusturago irakurtzen dut Amatiño arrazoiei bueltak ematen posta zerrendan, kriston kapazitatea du.

    bele)) Orain etiketa ezazu zure burua, zure jarduna… laupabost etiketa nahikoak izango al dira.

    1) euskalduna
    2) herrigintza
    3) espaloia
    4) goiena
    5) arantzabal


    arma)) Nahi baduzu, bota zuk orain galdera, nik erantzungo dut zure partez, atsegin handiz.

    Blogean erantzun ez duzunez… kazetariak teknikari edo teknikariak kazetari? Hi, kopiatu arantzabal.com-en ere e? edukia behar dugu sarean-eta… 😉


    > tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.

    Kateak apurtu behar direla ibiltzen naiz esaten beti… Ba bloga egin guran eta animatu ezinik dagoen horri akaso?… eta katerik ez baduzu apurtuko: blogetan “anonimo” erantzuten duten horiei.

  • e-hizketan,  hamaiK -hamaika kontu-

    Jabi Zabala: Paperezko egunkariak oso gutxi irakurtzen ditut egun

    jabi zabala

    baga) Blogaria zergatik?

    Zer pentsatzen dudan, zer gustatzen zaidan, munduaz dudan ikuspegia… ADIERAZTEKO. 2007an ez naiz fanzine bat egiten hasiko, ezta? Interneten komunikaziorako ahalmenak hasieratik liluratu ninduen. Nire bozeramale ofiziala da bloga.

    biga) gaur egun, zeintzuk dira zure egitekoak, zelan uztartzen dituzu blogarekin?

    Lantegian komunikazio munduan nabil, Internetekin lotutako zereginetan gehienbat. Horrez gain, nire egitekoak harrikoa egitea, lagunekin, lagunarekin, familiarekin egotea, txakurra ateratzea… Blogak denbora asko kentzen dizu, apur bat hemendik, apur bat handik… Desorekak beti sortzen dira bati asko emanez gero.

    higa) euskarazko komunitate bat dagoenik esan daiteke? Zuk zeuk, zelan ikusten duzu?

    Noski, bada euskal komunitate bat. Badira komunitate horretan sartuago dauden blogak baina baita aparteago daudenak ere.

    laga) Irakurri, idatzi, erantzun, ikusi, jarraitu…Internet zer da zuretzat?

    Norabide anitzeko eta izaera anitzeko edukien komunikabidea, nik une honetan informazioa eskuratzeko gehien erabiltzen dudana. Paperezko egunkariak oso gutxi irakurtzen ditut egun. Komunikatzeko, argazkiak argitaratu, testuak, bideoak, e-posta asko erabiltzen dut, saretik telefonoz deitu…

    boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?

    Botere autonomo txiki asko, zentsuraren aurkako berme gehiago, hirugarren munduaren presentzia handiagoa, hizkuntza txikien presentzia handiagoa…

    sega) Internet bidez, ezagutu duzu lagun onik, nor? non? noiz?

    Batzuk, bai. Esaterako, sarearen bidez lagun bat ezagutu eta haren etxean astebete pasatu nuen Holandan. Gehienak, baina, hurbilago ezagutu ditut eta euskaldunak dira. Hamar urte hauetan, Internet dela eta, dozenaka lagun interesgarri ezagutu ditut.

    zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…

    Erlaxatu, deskonektatu egingo nuke, hori bai, edonon egonda ere. Akaso hondartza-mendi egun bat litzateke, egun osokoa ia, aspaldi egin ez dudan horietakoa. Kostaldeko haitzarte bakartian biluzik bainatu, bokata jan eta gerizpean zerbait irakurri… Gero herrira heldu eta zerbeza hotz batzuk edanda oso zoriontsua izango nintzateke. Oporrak behar ditudala igartzen da, ezta?

    zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.

    Garai batean egunero irakurtzen nuen alt1040.com, hain famatua bilakatu aurretik. Egunero blog, webgune eta hedabide zenbaiten bilan modukoa egiten dut. Ezagutzen ez duzun bat gomendatuko dizut: www.wsahara.net – ingelesez Mendebaldeko Saharari buruzko informaziogune bikaina.

    bele)) Orain etiketa ezazu zure burua, zure jarduna… laupabost etiketa nahikoak izango al dira.

    kazetaritza, hizkuntzak, baroja, argazkiak, sareak

    arma)) Nahi baduzu, bota zuk orain galdera, nik erantzungo dut zure partez, atsegin handiz.

    Noiz bueltatuko dizkidazu zor dizkidazun 30 euroak? …Broma da. Zein izango da zure hurrengo proiektu zoroa, duela hamar minutu bururatu zaizun hori?

    iPtx: Egia esan, aspaldion zer egin pentsatzen dihardut. Interneten jauzi bat eman beharra dagoela uste dut. Podcasting-a izugarri gustatzen ari zait, etxean egindako saio bat daukat aspaldian buruan, eta udagoienean horretan murgildu gura nuke. Baina galdera sorta hau, bidenabar, nire iparrorratza ez herdoiltzeko baliatu gurean nabil. Zer egin hobeto asmatzeko. Hamar minutu baino gehiago daroat horrekin bueltaka.

    tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.

    E-goitz Goikoetxeari, reggaezale, blogari eta Euskal SEO gizon bizkorrari