pasahitza
Bertsogintzaz
-
Bertso eskola birtualak
#etxeangeratu eta bertsoaz gozatu
Asteon bertsotan egiteko ere aukera baliatu dugu. Distantziak eta isolamendua ez dira oztopo. Whatsapp bidez ibili gara Larrabetzuko bertso eskolan, eta Hori Bai gaztetxean batzen garenean bezain ondo aritu gara.
Pirinioko bertso eskolan berriz, distantzia edo lan kontuengatik hurbildu ezin dutenak ere elkartu gara. Esperientzia ona.Larrabetzuko bertso eskola
Astelehenean hasi ginen bertso eskola birtualean. Horretarako gura zutenak taldetxo baten batu eta hitzartutako orduan zita. Etxahun Lekue izan ohi da irakaslea eta astelehenerako ere gaiak eta ariketak prestatu zituen.
Eta hor ibili ginen bakoitza, bere kopla edo bertsoa grabatu eta besteei igortzen:Joan etorrikoak izan ziren. Erantzunak. Trufa. Giro ona. #bertsobirusa
Pirinioko bertso eskola
Baigorritik LarrabetzuraUdazken negua Aezkoa aldean eman nuenez, asteazkenero Errora joaten nintzen hango lagunekin. Xabi Terreros da han arduraduna, eta talde polita batu gara. Aurten gainera Bardoak ere jokoan daudenez, asistentzia polita izan da urtean zehar. Giroa ere halakoa. Aribe, Garralda, Aurizberri, Eugi, Erro edo Meskiritzeko lagunak batu eta oso giro polita topatu dut Pirinioan. Horrek bultzatu nau urte barriarekin batera, Larrabetzuko bertso eskolan aspaldiko partez bertsoei heltzera. Eta enaiz damutzen.
Abenduan agurtu nituen Pirinioko bertsolariak. Bardoetan elkartu ginen berriz, Erron. Eta aste honetako eskola birtualak eman digu berriro horretarako aukera. Eta egia esan, Terrek ere ondo prestatu zuen eskola. Eta hari erantzuten saiatu ginen hitzordura hurbildutakook.
Agur bat hasteko:
Baigorritik Larrabetzura, Pirinioan
Baigorritik Karin, Aurizberritik Aitor, Garraldatik Leire, Errotik Fernando, Ibai ere Aurizberritik edo, Garraldako irakaslea den Beñat Berastegitik, Xabi irakasle lesakarra Iruñerrian egonen zen ziurrenik eta ni neu Larrabetzuko etxealditik.Horrelako batzuk joan ziren.
Beñatek behinola botatakoa ekarri zuen gogora irakasleak, -maiz gure bertso artxiboa da whatsappa!- eta eskolakook entzun ahal izan genuen.
Eta amaieran, agurra Habaneran egiten ausartu zen Leire. Itzel ondo pasatu genuen seinale. Eta ikasten ari garela ez ahaztu. Eta batez ere ondo pasatzen. Ez da gutxi. Milesker lagunok.
Bertsoko eskolakoak telebistan
- #bidegorritik, #Patakon, 18/98+, agit/prop, albisteak 2.0, bakegileak, gaztelumendi.eus, hurrengo geltokia, ikusi eta ikasi, larrabetzutik, literatura, musika, pasahitza, software librea, su-etena | ceasefire | tregua, teknologia berriak, telebista
13 urte blogean, ekinean, ahaleginean
sare sozialak, blogak, internet, sarea, lagunak eta norbera pantaila aurrean. 13 urtez ekinean. ezinean. ahaleginean.
gaur ere abenduaren 3a da.
ea zer diozuen, irakurtzen zaituztedalako. aspalditik. hemen nago eta asko pozten naiz. oraindik.13 urte, besterik ez
2004ko euskararen egunean jarri zen martxan gaztelumendi bloga.
orduz geroztik ahal izan dudan guztia idatzi eta kontatu dut berton -eta beste leku askotan-. irratigintza, komunikazioa, literatura, telebista, bidaiak, aldizkariak, erreportajeak, mobilizazioak, informazioaren kudeaketa, auzolana, gutunak, erreportajeak, batailak, kezkak, kanpainak, lana, iritziak, salaketak, hedabideak, teknologia berriak, musika, herrigintza, harremanak, auzoko kontuak, kultura…. izan dira nire bizitzako ardatz; eta libre konpartitzeko aukera eman didate teknologiak, software libreak, hizkuntzak eta sorkuntzak.ezin eskertuago nago.
KRONIKA DIGITALA
ARTXIBOAK, artxibologia
sarean.com sortu zuen Jabi Zabalak 2003an. Ondoan izan dudan erreferentzia, duda barik.
Egunerokotasuna hautsi gurean, bitakora 2004ko euskararen egunaren biharamunean.
Joxe Arantzabalek bloga sortu eta egun berean eman zuen gaztelumendiren berri bere orduko Faroan.
Blogei buruzko ikastaroa antolatu genuen 2005eko udan UEUn
2006. urtean Euskal Herria 2.0 inflexio puntua Interneteko euskal panoraman, iparra eta helburuak markatu genituen. EUS dominioa lortzen hasteko abiapuntua.
Blogariak, software garatzaileak, hedabideetako arduradunak, kulturgileak, irakasleak… batu ginen Donostiako Artelekun. Ez daukagu ahazteko 2006ko iraila hura. Gauzak egiteko gogoa somatzen zen Euskal Herriaren alde digitalean. Auzolanean, 2.0 logika guztiz barneraturik.
EH 2.0 > puntuEUS
Zazpi urtez idazten, gogoratzen hasten zarenean…. amaituko denaren beldur zarelako.
10 urte bloga sortzen hasi nintzenetik, lekutan dago 2004ko abendua! http://t.co/78lJEaVveH pic.twitter.com/0S8khluE7b
— patxi gaztelumendi (@iPatxi) 2014(e)ko abenduak 3
luzaroan jarraitzeko asmoagaz. GAZTELUMENDI.eus #ga1d3rantzunak
galdera asko ditut egiteko. erantzunak etorri egiten dira. sortu.
kezkak idatzi, bizitza bete, amets ugari, letra asko, irudi batzuk eta zenbait ondorio.
#ga1d3rantzunak hitza eta ekintza dira, baldintza eta ondorio, objetibo beste subjetibo, sujeto eta adjetibo. teoria eta praxia. -
Etxahun Lekue: Txapelak poz itzela eman dit, 
heldutako mezu guztiek be bai
Zorionak Etxahun, txapelduna zara .
Bai, ez da nire buruari inoiz derrigortzat ipinitako gauza bat, baina sari polita da. Txapelak poz itzela eman dit eta zorion moduan heldutako mezu guztiek be bai.Herrian be jendeak poztasunez hartu du gainera.
Bai eta badaukat hori eskertu beharra, egia da jende askok orain zoriondu nauela, baina beste batzuk urteatan dabiltza nire atzetik; bai Bizkaiko txapelketan zein Euskal Herrikoan kantatu izan dudanean -eta ez herritik 20 kmra, urrinago be bai- beti joan da herritar multzo polita saioak ikustera. Ez dakit inoiz eskertu izan dudan baina orain bada eskertzeko momentua, batez be hasieratik jarraitu nautenei.
Xabier Amurizak txapeldun moduan ibiltzeko. Zein izango da zure zeregina aurrerantzean?
Gura nuke askorik ez igartzea. Badakit normalean kantatu ez dudan saioren baten kantatzea tokatuko dala, ez dira asko izango halan da be; baina batez be, nire buruari aurrerantzean jarri diodan derrigortasuna izango da normalean urtero deitu izan nauten lekuetako antolatzaileei erantzutea eta saio horretako entzuleei eskertzea. Plaza barrietan bai, baina betikoei erantzuten jarraituz.
Bizkaiko bertsolari txapelketa Larrabetzuko frontoian.
Oso giro ona egon zan Larrabetzuko saioan be.
Larrabetzuko saioan danak urten eban ondo. Saioa norbere herrian danean ardura gehigarri bat egoten da, izan be, helburu pertsonalei begiratzeaz gain saio onak urtetea, jende asko batzea eta giro ona egotea gura izaten da. Aurreko egunetan be igarten zan herritar asko be joango zirala eta eurori saio on bat eskaini eta finalerako txartela lortzeak asko poztu ninduen.Maila onean dago Bizkaiko bertsogintza?
Bizkaiko bertsogintza osasuntsu dago. Maila txukuneko bertsolari multzo polita dago eta finala izan da horren erakusgarri. Erreleboa modu naturalean eta apurka emoten dabil eta hori seinale hona da. Bestalde bertso eskoletan alkarregaz harremantzeko gero eta ekimen gehiago egiten dira eta horrek sano eragin positiboa deko.Zuk zeuk ie 30 urte bertsoaren inguruan.
Bizitza osoa daroat bertsoari lotuta. Gaur egun lanbidea eta zaletasuna dot. Ibilbide nahiko berezia eduki dot, izan be, taldean hasi banintzen be hamalau bat urtegaz bakarrik geratu nintzen herrian. Ordurako baneukon harremana inguruko beste bertsolari batzukaz eta horreri esker segitu nuen neurri baten. Ez naz sekula damutu.__________ __________________ ______________ ______________
Bizi LARRABETZU
Bizi LARRABETZU herri aldizkarirako egindako elkarrizketa.
Bizi LARRABETZU herri aldizkaria Mixel Berhokorigoin laborari eta bakegilea gogoan
-
Kutxa eta txistuak
Arretaz eta harriduraz irakurri ditut Kutxako arduradun honen hitzak gaurko egunkarian.
erakunde jakin bati emandako txistukadak eta beste erakunde jakinei emandako txalo zaparradek bertsolaritzaren kultur jarduerari berari zein mesede edo kalte egiten dioten hausnartzera gonbidatu nahi ditu bertaratu zirenak
Bertsolaritzaren kultur jarduerari zein mesede egiten dioten ez dakit, eta kalterik bai? Bertan batutako 9.000 entzuleek, eta bakoitzak une oro txistu edo kantu, edo txalo, edo irribarre egiteko eskubiderik ez badu… zer egin behar du, ordaindu eta isil isilik egon, eta agintari guztiei men egin? Uste nuen, txalo eta txistuak protokologaren parte zirela honezkero, hogeitaka urteetako kultur jardueraren ostean.
normalizazio politikoan murgiltzeko ahalegina tokatzen den garai honetan, erantzukizunez jokatzeko hainbat bertsolarik egindako gonbitea, norberak egin beharreko gogoetaren lagungarri
- Zer ikusi du giro politikoak? eta egoera ekonomikoak?
- Banketxe, kutxa eta abarren jarrerak hipoteken aferan izango du harremanik txistukadarekin?
- ETAk armak utzi dituela eta, jendea etxeetatik botatzeari utziko diozue zuek ere?
- ETAren kontu honek, askorako ematen du, baiki, baina batzuen muturrak ez du zerikusirik egoera ekonomikoarekin. Banketxe, kutxa eta kutxazainei txistu egiteko mila motibo daude egon, egunero 7 etxebizitza desjabetzen diren euskal erdi honetan.
Gaur eta hemen, badago Kutxari (ere) txistu egiteko motiborik, eta egitea gainera zilegi iruditzen zait.
Kutxak, Gipuzkoan bakarrik ez, Katalunian ere bota du etxetik jendea
Kutxa eta desjabetzeei buruzko, beste albiste bat; horrenbeste dira
Bertsolaritza klinikoaz, beste bi hitz
Bidebatez, bertsolaritzan gai politiko eta transzendentalak edo mediku gaiak.. hori bada aukerakoa, bada zer hobetu. Kultur jarduerak, egoera sozialarekin ere jakin behar du jokatzen. Badira mila gai, mila motibo kantatzeko oraindik. Alde horretatik, eskertuko litzateke, eta asko, egoera sozial eta ekonomikoarekin, hemen zein mundu osoan lotura duten gaiekin saiakera bat egiteak. Medikuntzaren lekua bertsolaritzan horrenbestekoa izan ez dadin.
Zorionak @asarriegi!
Azkenik, bereziki zoriondu gura dut Aitor Sarriegi txapelduna. Beñat Gaztelumendik ere lan oso txukuna egin zuen, eta ez ninduke harrituko txapela berak eroatea. Beasaindarrak irabazteak, poztu ninduen, eta uste dut poz kolektibo ttiki bat hedatu dela sare sozialetan ere, bere htc mugikorrarekin, lantzean behin astintzen ditu eta bertsolari bertsozale informatikari informatikazaleak. Bejoindeikela @asarriegi ! -
Bertsolaritza eta apustuak
Asaldatuta somatu genuen Andoni Egaña 7K-ko elkarrizketa ezin luzeagoan.
Ez da egon ez baimenik ez irabazirik, ez bertsolarientzat, ez Bertsozale Elkartearentzat. Euskaldunoi beti iruditu zaigu ekimena gauza ona dela eta batzuentzat txarra da. Geldirik egongo balira, hobe. Apustuen kontu horrek gure jarduna zabartu egiten duela uste dut. Gu ez gara ez Kaiku, ez Reala, ez Portugalete. Gu bertsolariak gara. Imajinatzen duzu apustuen makinan egotea nork irabaziko duen hurrengo Euskadi Literatura Saria?
Argiako hari@ak ideia bati heldu dio, eta hari horri jarraitu gura nioke. Luzeago, zer pentsatua emango duelakoan.Andoni Egaña, btn09 txapelketan. Argazkia: Urko Lasarte Wikipedia Commons
Andoni Egañarenak hona ekarri, eta sortu zaizkidan txinpartak botako ditut… bat batean… errima barik, baina puntua jarrita. Ahal bada zorrotz, eta neurri librean.
“Ez da egon irabazirik...”
Eta irabazirik balego bai? Alegia, makinetakoek apustuen truke bertsolariak edo beraien elkartea sarituta, zurituta legokela ihardetsi gura du zarauztarrak? Alegia, irabazien gora beherak egiten du ona edo txarra hautu bat. Hortik abiatuta, beste kontu asko ulertu ditzakegu.
Bertsolaritzaren ajeak
Nik uste, bigarren boom bat bizi duela bertsolaritzak. Lehenengoak asko izan zuen Egañaren lehen txapelaren garaian, bigarrena bere txapela galtzearen sasoian dator. Telebista, Hitzetik Hortzera, belaunaldi berri baten agerketa… izan ziren orduko arrazoiak.
Transmisioa, zaletasunaren hedakuntza, medioetako presentzia, erreferente berriak, bertso eskoletan eta irakaskuntzan bertsogintzari lotuta dauden milaka ikasle eta urtez urte horretan dabiltzanak. Elkartearen lana… eta beste daude.Eta bizi dugu sasoi neoliberal honetan, bertsogintza ere hartu du olatu horrek. Txanpon makinak eta banketxeak zertan dira ezberdin? Etikoagoak dira Kutxa eta bebeka, kirol jokoa baino? Ontzat hartzen ditugu euskal kutxen iragarki etengabekoak, euskaltelen bluetooth iragarkietaz orditu arte informatu gaituzte azken txapelketan, telefonoak itzali behar zirela esan ostean. Imajinatzen duzu tabako iragarki bat, erre ezin daiteke saio batean….?
Etekinari baino begiratzen ez diogun bizitza honetan, bertsogintza ere excell taula batean neurtzen da. Neurriak eta puntuak. Errimak eta etekinak. Eta etekinak eta neurriari, markari begiratzen dionak soilik, normala apustuarena botatzea… normal normala.
Aparraren ostean
Maialen Lujanbiori autografoak eskatu zizkioten Hernaniko udaletxean egindako saioan. Neskek badute idolo berri bat. Goazen! programatik bertsolaritzara. Telebistatik kulturgintzara.
Egun osoa telebistan, milaka ikusle… ondorioak nabarmenak.
Zaindu da zaindu beharrekoa, eta mila detaile dago hor… baina handitu handitu handitu… txikleak ere eztanda egiten du. Eta bertsolaritzari, zenbaitetan aparrak gainezka egin dio edalontzitik, nahiz eta sagardotegietako ontzirik handienak eduki… normala ere izango da. Eta hartuko du berriz ere neurria. Apurka apurka.Espektakulua
Estetika audiobisuala, Bizkaia Arena, milaka ikusle, telebista eta Internet zuzenean… Bertsolaritza izan daiteke espektakulu. Gaur BEC, eta bihar Kursaal. Antzoki eta gaztetxe. Kontzertu osteko, edo opera aurreko. Espektakulua kontsumo kultura bilakatu da, eta kontsumoak kontsumismoa dakar… bere horretan. Eta hau, ajeetako bat baizik ez da. Eztabaida sortu lezakeena… zer pentsatua emango diguna. Eta Egañak, pentsatuko du, hausnartuko du, konpartituko du eztabaida hori.herri kirola
Iragarkiak, lehia, herrikoia, popularra, euskalduna, betikoa, tradizioa… zerk ezberdintzen ditu sokatira, harri jasotzea, aizkora edo bertsolaritza. Hizkuntzak soilik? Modernotasunak?
Bertsolaritzak gertu izan du beti apustua. Eta berdin berdin egunkarietako porretan, edo lagun arteko sailkapen desafioetan. Nik neuk be, afari bat baino gehiago irabazi ditut bertsolarien kontura. Oraindik baten bat kobratzeko dudn arren… ez naiz hasarratuko.
Lehiak apustua du lagun. Apustuak dirua…. diruak… edozer.
Gure herrian lehia eta lana, lanak eta kultura, kultura eta hizkuntza… herria gertu, gertuegi. Batera sarritan.
Asegarcekoek telebista produktora ere badute, eta bati baino gehiagori pasatu zaio burutik inoiz Argiñanok ekoiztutako bertso programa bat, ezta? Argiñano bera ikusi genuen Ane Igartiburuk aurkeztutako ETB2ko saioan…. harrapatzen duzue, ezta?Bertsolaritza eta apustua gertu daude lagunok, etekinak eta irabaziak guztiok ditugu xede. Ekonomikoak, kulturalak, audientziak, sarrerak… labankorra da, eta badago zertaz jardun. Zertaz eztabaidatu.
Eta badakit jakin, honetaz bertsolariekin lasai eta zabal berba egin daitekela, eta bertsozaleek be badutela kezka franko… eta bertsogintza herritarra ere lantzen dela, eta transmisioa, eta baloreak, eta herrigintza, eta… hamaika gauza gehiago.
Zer uste duzue zuok ba?
-
nork ez du negarrik egin?
Miren eta Arantzaren alabek, Maddalen eta Mirenek…kantuan jarri zuten Kursaal azpiko jatetxea, eta negarrez jarri dute Euskal Herri erdia.
Bertso jarriak, amari eskainiak. Sorta alai, gogotsu kantatua, doinuz aberatsa eta estetikaz berria. Inoiz entzun bako modukoak, ondo gogoan hartzekoak. biba zuek!
Harro egon daitezke Amuriza eta Arzallus ere. -
Maialen Lujanbio: norena da bertsoa?
Aurrekoan bertso saioa euki gendun herrian, gaztetxean. Bertso saio bizia, beroa, jendetsua eta gaietan zein edukietan oso oso txukuna. Lau bertsolari eta gai jartzailea gaztetxeko eskenatokian. Eta publiko entregatua, gaztetxea txiki egin zuena. Horrez gain, -badakizue honezkero- saioa Internetetik emititu eta askok tabernatik eta batzuk etxetik jarraitu zuten saioa.
Txapelketan, gai moduan ibili dugu batzuk norena da bertsoa? galdera hori. Etxahun Lekuek Maialen Lujanbiori jarri zion. Pozik entzun genituen Euskal Herriko txapeldunaren bertsoak.
Maialen Lujanbio:
Norena da bertsoa?
[audio:http://www.larrabetzu.org/bloga/audio/horibai091225/norena_bertsoa.mp3]
Gaiarekin interesatuta egon ezkero, plaza baino gehiagotan aritu da bat baino gehiago honen inguruan. Txapelketa amaitu da, bertsogintza ez ordea. Gaiak hor jarraitzen du, plazarako zein sarerako.
Eztabaida sarean
gaztelumendi.org | Zuzeu.com | sustatu.com |
Gaiak oihartzuna izan du Telebistan, txapelketan eta beste hainbat gunetan. Baina Maialen Lujanbioren bertsoek, bidea apur bat argitu ere egiten dutenez, zorionak eta eskerrak Maialeni berari. Eta Larrabetzuko bertso eskolari, saretik plazara gaia ekartzearren. Guk barriro, sareko plaza eskaini diogu.Saioa osorik larrabetzu.org plazan. Gaztetxetik sarera:
[audio:http://www.larrabetzu.org/bloga/audio/horibai091225/osoa.mp3] -
Gaztetxetik bertso saioa zuzenean Internet bidez
Urtero gabonetan bertso saioa egiten da gure herrian, Andoni Egañak txapela irabazi zuen urtetik. Orduan Anoetako belodromoan aritutakoak egon ziren gure herriko frontoian. Hurrengo urtean ere bertso saioa egin genuen berriz ere, eta hotz ikaragarria egiten zuen 1995eko abenduaren 25ean.
Handik aurrera gaztetxean egiten hasi ginen, Xabier Amurizak halan proposatu eta aholkatuta. Xabier Amuriza, Andoni Egaña eta Jon Sarasua izan ziren besteak beste… eta urtero bertso saioa. Eta 2009an gaude jadanik.
Aurten be, laukote galanta dator. Maialen Lujanbio, Miren Amuriza, Unai Iturriaga eta Igor Elortza.
Argazkiak.org | bertso saioa Internetetik © cc-by-sa: gaztelumendi.orgSaioa sarean eskainiko dugu, gaztetxea txiki geratzen dela aprobetxatuta. Herriko taberna batek telebistatik eskainiko du guk Internetetik emango duguna, eta munduko edozein txokotatik, Larrabetzuko edozein etxetik jarraitu ahal izango da bertso saioa zuzenean arrastiko 7etatik aurrera.
Dagoeneko Hori Bai gaztetxeko telebista badabil.
Watch gaztetxetik zuzenean from horibai larrabetzu.org -
Jabetza industria
Mikel Elorza | Berria
Bolo-bolo ibili da gaia, Durangoko Azokan aurreneko aldiz liburu-e dei dezakeguna ikusgai zegoela. Eta atentzioa eman dit hainbat argitaldarik jabego intelektualaz azaldu duten kezka, eztabaidaren zurrunbiloan ene ustez astakeriak esateraino (lapurretarekin alderatuz artxibo baten deskarga…). Sortzaileen eskubideak errespetatu behar dira, horretan ados gaude guztiok, eta bilatu behar ditugu formulak horretarako; baina horrek ez du esan nahi beste batzuen negozioak errespetu maila bera behar duenik. Zeren eta batzuek negozioak egiten dituzte nekez aberasten diren sortzaileen eskubideen kontura, pentsua besteen pentzura maiz, eta negozioak negozio izaten jarrai dezan dute borroka latza. Eskubide, pirata eta antzeko hitzekin batera, esanguratsua da holakoetan azaltzen den beste bat: industria. Hori da indartu eta zaindu eta gorde behar dena, eta horri egiten dio, itxuraz, kalte, morroiloak kentzeak. Ez onartu nahian teknologiak aldaketak ekarri dituela, ekoizpen eta banaketa moldeak aldatzen ari direla, kontsumo eta partekatze ereduak ere bai, hedadura moldeak desberdinak direla eta horretara denok egokitu beharko dugula, baita industriak ere. Negozioa galtzeko bada ere. Baina ai, lagunok, eskubide horiek jabetza eskubideak dira, eta horien funtsa antzinako erromatarrek zuzenbidea finkatu zutenetik muinean ez dira askorik aldatu. Eta kostako da, gaur egungo erromatarrok ere —hau da, zibilizazio menperatzaile nagusia, bizimodua arautzen duena— jabetza eskubidea bizimodu eta zibilizazio horren zimentarri baitugu.
Gaztelaniaz bada esamoldea, ezin zaizkiola zelaiari ateak jarri. Beti pentsatu dut esan nahi ederra duela, eta horren alde borrokatu behar dugula, baina mendiak atakez josita daudela, langa eta txarrantxez beteak. Interneten ere berdin: jarri nahi dizkiote morroilo eta kisketak, ari dira horretan, eta segitu beharko dugu horiek gainditze lanean.
Ateak uste ez duzunean topatzen baitituzu. Ez dute gaurko BECeko finalean jarriko, gaia, hauxe: “Zu Amets, bertsozale porrokatua eta kazetaria zara, Interneten aritzen dena, eta kronika eder bategaz batera finaleko saioa zure webean eskegitzeko asmoa duzu. Baina Sustraik, elkarte antolatzaileko bozeramaileak, e-maila bidali dizu zeinak dioen, “Bergara eta Donostiako saioak oso osorik zintzilikatu dozuzala badakigu. Finalera begira, akreditazioa jasotzeko hitzarmena sinatzea eta bidaltzea eskatuko dizugu aurrez”. Hitzarmen horrek, jakin dezazuela biok, debekatu egiten du saiorik osorik eskegitzea, 6 bertsoaldi eskegitzen baino ez du uzten. Hiruna bertso nahi duzuen doinu eta neurrian”. Ez dute gaur horretaz kantatuko, ezta beharrik ere, baina proposatzen dut hurrengo saio baterako, txapelketatik at. Nire lagun bati gertatua baita, e-mail hori jaso egin du. Imajinatzen dut iritziak elkartean ere asko eta diferenteak izango direla, eta eztabaidak, baina hainbat lan eta ekimenetan eredugarria den eta lan eskerga egiten ari den Bertsozale Elkartearen aldetik asko harritu nau, egiaz diotsuet. Saioen erretransmisioa ere baimendu izan duelarik. Elkarteak noski ez du saioak eskegi izanagatik kazetariaren aurka deus egingo, baina abisua bera eta hitzarmenaren baldintzak…
Ez diezaiola honek, hala ere, bertsoaren festa nagusiko argiari itzalik egin. Jabetza eskubideen harira kontatzekoa zen, ustez. Gaur besterik da: 14.000 lagun entzun eta ikusten, zortzi lagun oholtzan. Ez da iazko haizea. -
BECetik zuzenean: entzun, ikusi eta idatzi
Bai, ni ere BECen nago. Eta beste horrenbeste mila lagun. Eta saretik ari gara, eta twitter bidez beste horrenbeste, eta Telebistatik, edo saretik munduko txokoren batetik….
Asko gara, ez dakit herri oso bat garen, baina herria izan egin bizi duenik badago hemen. Sentitzen da.
Sarean ere bizi dugu.
Gu herriko hiru lagun ari gara larrabetzu.org atarirako multimedia kronika batzuk egiten.
Audioa audacityn grabatzen, eta badaezpada -nork jakin- mp3an grabatzen. Belarria.
Argazkiak egiten begi onena duena, eta dagoeneko sarean dira batzuk. Begia
Idazten ari naiz ni. Neurri txikian zein luzeagoan. Ikusten dudana kontatu gurean, entzuten dena zuei esateko gogoz. Eskua.Finaleko argazkiak ikusi gura badituzue: larrabetzutik mundura.